17 мая 2016 г.
Вĕренỹ тата пĕлỹ енчен ваттисен сăмахĕ иксĕлми пуян: "Пĕлни çăкăр ыйтмасть, хăвнах кирлĕ пулĕ", "Çĕр çул пурăн, çĕр çул вĕрен"... Ку чухнехи кăткăс пурнăçра ĕç шыраса хăшкăлакансемшĕн çак сăмахсем уйрăмах пĕлтерĕшлĕ. Ĕç рынокĕнче ыттисемпе тупăшса ăнăçтарма пултарас тесен профессие алла илмелле. Хăшĕсем Комсомольскинчи халăха ĕçпе тивĕçтерекен центр пулăшнипе çапла тăваççĕ те, пĕлĕве вĕçĕмрен тарăнлатаççĕ, хушма специальноç туянаççĕ.
Центр ĕçсĕр çынсене, пепкине 3 çула çитиччен пăхакан амăшĕсене кăçал тĕрлĕ заведенисене направленипе çĕнĕ пĕлỹ илме янă. Ĕç рынокĕ кĕтекен профессисене, килĕшỹ тусах вырăнпа тивĕçтерессисене шута илнĕ паллах. Вĕренỹ тапхăрĕ вара 6 уйăхран нумайрах тăсăлмасть.
2016 çулхи январь - май уйăхĕсенче ĕç рынокĕ ыйтакан профессисене (тракторист - 6 çын, "1С:Предприяти" - 3 çын, уйрăм хуралçă - 18 çын, экскаватор машинисчĕ - 4 çын, ĕнесене машинăпа сăвакан оператор - 12 çын) вĕренмешкĕн 43 çынна янă.
Çавăнпа пĕрлех çитес вăхăтра "визажист" тата "1С: Предприяти" специальноçсене вĕрентес тапхăр пуçланать.
Унсăр пуçне ачана 3 çула çитиччен пăхмашкăн отпуск илнĕ хĕрарăмсене професси енĕпе хатĕрлес, квалификацине ỹстерес тĕллевпе "Маникюрша (педикюрша)", "Оператор 1С: Предприятие", "Повар" специальноçсене кĕртме палăртнă.
Çĕнĕ пĕлỹ илес кăмăллисене Комсомольски ялĕ, Завод урамĕ, 29-мĕш çурт адреспа кĕтетпĕр. Тĕплĕнрех 8(83539) 5-13-79 номерпе шăнкăравласа пĕлме май пур.
К.КОКШИН,
директор.
Источник: "Каçал Ен"