29 апреля 2016 г.
Вут-çулăмпа кĕрешекенсен ĕçĕ сумлă та хисеплĕ. Пирĕн пушар сỹнтерекенсем хăюллă, хастар та тỹсĕмлĕ пулни, йывăр лару-тăрура çухалса кайманни граждансен тăнăçлăхĕн тата хăрушсăрлăхĕн шанчăклă никĕсĕ пулса тăраççĕ. Пушар службин ĕçченĕсен пысăк ăсталăхĕ, çивĕч ыйтăва çийĕнчех татса пама пултарни тата кал-кал ĕçĕ нумай çынна вилĕмрен çăлма тата миллионшар тенкĕлĕх пурлăха сыхласа хăварма май парать. Çакăн пеккисем тăрăшаççĕ те район пушар хуралĕнче. Вĕсенчен нумайăшĕн ĕç стажĕ 10 çултан иртнĕ. Виçпỹрт ялĕнче çуралса ỹснĕ, 31-мĕш пушар чаçĕнче водительте ĕçлекен Иванпа Анатолий Тихоновсен пĕрлехи ĕç стажĕ - 37 çул.
Иван Федорович вăтам шкул пĕтернĕ хыççăн Канашри 1-мĕш училищĕре водителе вĕреннĕ, "Комсомольский" совхозра ĕçлеме пикеннĕ. Самарăри автомобильсен çарĕнче службăра тăнă. Яла таврăнсан Иван вырăнти киносетьре, каярах шалти ĕçсен пайĕнче водитель пулнă. Пенсие тухсан вара пушар чаçĕнче ĕçлеме пикеннĕ. Унтанпа 15 çул та иртнĕ ĕнтĕ. Иван Тихоновăн машини яланах юсавлă, инкек вырăнне наччасрах çитме хатĕр тăрать. Иван Федорович Канаш хулинче лакокраска завочĕ çуннă çĕрте çав тери пысăк пушара сỹнтерме пулăшнă. Мăшăрĕпе Александра Николаевнăпа виçĕ пăхаттир çитĕнтернĕ, тивĕçлĕ воспитани панă.
Анатолий Тихонов пушар хуралĕнче 1994 çултанпах ĕçлет. Анатолий пур çĕрте те маттур, вăл ĕçре çеç мар, спортра та хастар, республикăри пушар спорчĕн ăмăртăвĕсенче кашни çулах малтисен йышĕнче. Унсăр пуçне 2010 çулхи пушарсене сỹнтернĕ çĕре те хутшăннă, медаль илме тивĕçнĕ, Тав çырăвĕсем те килти архивра упранаççĕ. Н.АРХИПОВА.
Источник: "Каçал Ен"