26 апреля 2016 г.
Иртнĕ эрнере Чăваш Республикин Пуçлăхĕ Михаил Игнатьев Шупашкар тата Чăваш митрополитне Варнавăна 85 çулхи юбилей ячĕпе саламланă. Михаил Васильевич Варнава Владыкăна Вырăс православи чиркĕвĕшĕн тата чăваш халăхĕшĕн чунне парса ĕçленĕшĕн чĕререн тав тунă.
- Эсир обществăн чун тасалăхĕпе кăмăл-сипетлĕхĕшĕн, религисем хушшинчи хутшăнусене, çамрăксен воспитанийĕпе православин таса енĕсене чĕртсе тăратас тĕлĕшпе пурнăçлакан ĕçсен пĕлтерĕшне хак парса çитерме май çук, - палăртса хăварнă республика Пуçлăхĕ.
Çавăнпа пĕрлех регион ертỹçи Варнава митрополит тăрăшнипех республикăра чиркỹсемпе прихутсен шучĕ ỹснине, православи тĕнне ĕненекенсен йышĕ пысăкланнине, социаллă çивĕч ыйтусене татса парассипе чиркỹпе влаç органĕсем çыхăну тытса ĕçлесси вăйланнине палăртнă. Михаил Игнатьев Варнава Владыкăна çирĕп сывлăхпа, тăнăçлăхпа тата нумай çул пурăнма, чиркỹпе Тăван çĕршывшăн пуçаракан ĕçсенче ăнăçу суннă.
Источник: "Каçал Ен"