22 апреля 2016 г.
Ĕç ветеранĕсем çинчен калакан Чăваш Республикин саккунне ăçта ĕçлени тĕлĕшпе улшăнусем кĕртнĕ. Çак ята илес тесен республикăра мĕн чухлĕ ĕçлемелле?
Ираида Никитина, районти социаллă хỹтлĕх пайĕн начальникĕ:
- Ăçта ĕçлени тĕлĕшпе ĕç ветеранĕсем çинчен калакан саккуна улшăнусем кĕртнĕ. Арçынсен асăннă ята илес тесен Чăваш Енре 21 çул та 3 уйăх ĕçлемелле, пĕтĕмĕшле стаж вара 42 çул та 6 уйăх пулмалла. Хĕрарăмсен республикăра 18 çул та 9 уйăх ĕçлемелле, пĕтĕмĕшле стаж - 37 çул та 6 уйăх. "Ĕç ветеранĕ" ята тивĕçнĕ ĕçлемен пенсионерсене пенси çумне 1082 тенкĕ хушса тỹлеççĕ. Çĕршыври экономика лару-тăрăвне кура ăна индексацилеме палăртнă.
Республикăра паянхи куна сумлă ята тивĕçнĕ 46,7 пин çын пурăнать. 2016 çулхи пĕрремĕш кварталта "Ĕç ветеранĕ" ята 651 çын тивĕçнĕ, "Чăваш Республикин Ĕç ветеранĕ" ята 1206 çынна панă. Вĕсен йышĕнче пирĕн район çыннисем те пур. Кăçал районти 40 çын çак хисеплĕ ята тивĕçнĕ.
Источник: "Каçал Ен"