22 апреля 2016 г.
Ял хуçалăх предприятийĕсен ертỹçисен паянхи кун чылай ыйту тавра пуç ватма тивет. Çураки çывхарса пынине кура техникăна йĕркене кĕртмелле, вăрлăх хатĕрлемелле, удобрени кỹрсе килмелле, çунтармалли-сĕрмелли япаласене туянмалла тата ытти те. Акă, Хайртдинов фермер хуçалăхĕн, "Слава" ЯХПК ĕçченĕсем нумай çул ỹсекен курăксене апатлантарма тухнă та. Çавăн пекех вĕсем кĕрхи культурăсене апатлантараççĕ, çĕре сỹрелеççĕ. Лару-тăрупа вырăнта паллашма район администрацийĕн пуçлăхĕ Алексей Самаркин, ял хуçалăхпа экологи пайĕн начальникĕ Илдус Миннетуллин апрелĕн 18-мĕшĕнче Хайртдинов фермер хуçалăхне çитрĕç.
Кунта чи малтанах хуçалăх ертỹçипе Фиргать Галиескеровичпа тĕл пулчĕç, тип-тикĕс те ем-ешĕл кĕрхи культурăсен анисене, сỹреленĕ хирсене пăхса çаврăнчĕç. Çĕрулми, тыр-пул вăрлăхĕсене тирпейлекен складсенче ĕçченсемпе тĕл пулса калаçрĕç. Алексей Александрович хуçалăх ĕçченĕсемпе ĕç килĕшĕвĕ çырмасăр тăрăшасси çинче уйрăммăн чарăнса тăчĕ, халăха ĕçпе тивĕçтерекен районти центра çитсе учета тăма, патшалăх паракан пулăшусемпе усă курма сĕнчĕ.
Складсенче ĕç шавĕ тăратчĕ, пĕринче ĕçченсем тыр-пула им-çамлаççĕ, тепринче çĕрулми вăрлăхне суйлаççĕ. Уй-хир культурисен тухăçĕ çине минераллă удобренисемпе усă курни пысăк витĕм кỹрет. Çак тĕллевпех Хайртдинов фермер хуçалăхĕ 74 тонна тĕрлĕ удобрени туяннă. Мĕн акатăн - çав шăтать, тенине тĕпе хурса тăрăшаççĕ хуçалăх ĕçченĕсем. Çавна май фермер хуçалăхĕ кăçал 448 гектар тĕштырă, 60 гектар куккурус, 50-60 гектар çĕрулми лартма палăртнă. Унсăр пуçне хуçалăх кĕркунне 110 гектар кĕрхи культурăсем акса хăварнă пулнă. Вĕсем вара лайăх шăтса тухнă, сип-симĕс кавир евĕр таçтанах куçа савăнтараççĕ. Пĕтĕмĕшле каласан, хуçалăхра çуракине вăхăтра ирттерессе, кĕркунне пысăк тухăç савăнтарасса шанма пулать.
"Слава картофелю" агрофирма ĕçченĕсем те çуракине тĕплĕн кĕтсе илнĕ, ăна ăнăçлă ирттерме мĕн кирлине хатĕрлесе хунă. Акана апрелĕн 19-мĕшĕнче пикеннĕ. Уяр çанталăкпа туллин усă курасшăн вĕсем. Çав кун ака ĕçĕсем мĕнлерех иртнипе паллашма район администрацийĕн пуçлăхĕпе ял хуçалăх тата экологи пайĕн начальникĕ Эткер ялĕ çывăхĕнчи хирсене çитрĕç. Кунта вара хĕрỹ ĕç пырать, пĕрисем сỹрелеççĕ, теприсем аксах пыраççĕ. Кĕçех 3-мĕш хирте çурхи тулă, 4-мĕш хирте урпа пуссисем ешĕл тумпа куçа савăнтарĕç. Ĕçченсемпе калаçнă май Илдус Хадзятович ака ĕçне пĕрремĕш пуçăннă хуçалăха ăнăçу сунчĕ. Çанталăкĕ лайăх тăрсан çитес вăхăтрах ытти хуçалăхсен хирĕсем те тракторсен шавĕпе тулĕç.
Н.АРХИПОВА.
Источник: "Каçал Ен"