18 апреля 2016 г.
Апрелĕн 14-мĕшĕнче Чăваш Республикин вĕренỹ институтĕнче регионсен "Туслăх хĕлхемĕ" наци культура фестивалĕн юлашки тапхăрĕ иртрĕ. Фестиваль программинче чăваш тата вырăс шкулĕсенче вĕренекенсем валли чăваш чĕлхипе тата культурипе ирттерекен "Çăлтăрчăк" вăйă-конкурс тата ỹнер ăсталăхĕн "Шевле-2016" конкурсĕ пулчĕ.
"Çăлтăрчăк" вăйă-конкурса хутшăнакансем пилĕк станци витĕр тухрĕç. Фестиваль вĕçĕнче ачасем пултарулăхĕпе тупăшрĕç, юрларĕç, ташларĕç, харпăр хăй сăввисене вуларĕç. Жюри фестиваль çĕнтерỹçисене палăртрĕ. Вырăс программипе вĕренекенсенчен Комсомольски 2-мĕш вăтам шкулĕнче пĕлỹ пухакан Александра Чернова (ертỹçи С.Г.Индюкова) призер пулчĕ. Чăваш шкулĕн программипе ĕçлекен шкулсенчен Шурут вăтам шкулĕн вĕренекенĕ Алиса Голубева (ертỹçи Л.Н.Тарасова) палăрчĕ.
Ỹнер ăсталăхĕн "Шевле-2016" конкурсĕнче Комсомольски 1-мĕш вăтам шкулĕн вĕренекенĕ Настя Горбунова (ертỹçисем Н.В.Игнатьева, В.Г.Гордеев) палăрчĕ.
"Туслăх хĕлхемĕ" фестиваль пуриншĕн те чăннипех пысăк уяв пулчĕ. Вĕренỹре те, пултарулăхра та шанăç паракан ачасем пуррине кăтартрĕ. С.ИНДЮКОВА.
Источник: "Каçал Ен"