12 апреля 2016 г.
Юрă-кĕвĕ çăлкуç шывĕ пекех. Ывăннине ирттерет, чуна кантарать, лăпкăлăх кỹрет. Кирлех-тĕк - хуйха та кăштах пусарать. Апрелĕн 7-мĕшĕнче куракансем ĕç кунĕ хыççăн культурăпа кану центрне пуçтарăнса районти пултаруллă артистсемпе паллашма пултарчĕç. Кунта гитарăна кăмăллакансем пĕрремĕш хутчен "Серебряные струны" фестивале пухăнчĕç.
Асăннă фестиваль опытлă тата калама тин çеç пуçлакан гитаристсене, гитара кĕввине юратакансене пуçтарчĕ. Мероприяти пуçласа çеç иртет пулсан та, ăна çỹллĕ шайра йĕркеленĕ тесе калама пулать. Çав каç курма килнисем Владимир Высоцкий, Виктор Цой, Олег Митяев, Юрий Шевчук произведенийĕсемпе, халăхран тухнă юрăсемпе тата вырăнти композиторсем хывнă кĕвĕсемпе киленме пултарчĕç, пĕлекен юрăсене артистсемпе пĕрлех шăрантарчĕç, кашни юрăçа е музыканта ăшшăн кĕтсе илсе тăвăллăн алă çупса ăсатса ячĕç.
Кашни самана нумай-нумай çын чун-чĕрине хускатса, çĕклентерсе, пăлхатса яракан поэт, юрăç, артист тĕнчене парнелет. Районта та çавнашкаллисем самаях. Асăннă фестивале вара Виктор Кокшин, кашни мероприятире, концертра пултарулăхĕпе палăраканскер, пуçарнă. Вăл çамрăксемпе ачасен искусство шкулĕнче те, эстрада студийĕнче те гитарăпа калама вĕренес кăмăллисене пуçтарать. Акă кĕçнерникун та унăн вĕренекенĕсем мĕн калас тенине алла гитара тытса чуна тивмелле, асра юлмалла, çав тери ĕнентерỹллĕн куракан патне çитерме пултарчĕç. Альберт Галкин, Никита Шорников, Евгений Антонов, Русланпа Ранис Тукаевсем вырăс халăх юррисене те, вырăс тата акăлчан паллă музыканчĕсен юррисене те вылярĕç. Тамара Долговăпа Надежда Тимофеева Георгий Перьев композиторăн "Анне" юррине кашнин чунне пырса тивмелле юрларĕç, курма килнисем куççульленмесĕр чăтаймарĕç.
Фестивале хутшăннă Георгий Печников музыка çемйинчен тухнă. Печниковсен династийĕн культурăри ĕç стажĕ 130 çулпа танлашать. Георгий Юрий Шевчукăн "Ветер" тата Виктор Цойăн "Последний герой" юррисене янăратрĕ. "Три аккорда" ансамбль хĕрĕсем Екатерина Карасевăпа Аделия Феткулина залра ларакансене такмаксемпе савăнтарчĕç.
Кашни талантлă çын хăйĕн пултарулăхне çитĕнекен ăрăва парнелесе хăварма тăрăшать. Аслă Çĕрпỹелти Маргарита Григорьевăшăн çаксем пуш сăмахсем мар, унăн воспитанникĕсем районти тата республикăри фестиваль-конкурссенче малти вырăнсене тухса вĕрентекенне савăнтараççĕ. "Серебряные струны" фестивальте Маргарита хăй уйрăммăн та гитарăпа каларĕ, вĕренекенĕсем те сцена çине тухса "Учкудук" юрра шăратрĕç.
Фестивале хутшăннă тепĕр хĕрĕн çамрăклăхĕ Комсомольскинчех иртнĕ. Унăн пултарулăхне пĕтĕм таврара пĕлнĕ, клубра иртекен кашни мероприятие хутшăннă вăл. Акă фестивальте те Лилия Митюкова хăй çырнă романспа куракансем умне тухрĕ. Юрий Любимов, Иван Портнов, Николай Маргиданов, Иван Мамуткин, концерт курма кăна килнĕ пулсан та, вĕсене гитарăпа каласа кăтартмасăр никам та ямарĕ, Иван Мамуткин темиçе юрă юрламасăр вара зал лăпланмарĕ.
Марина Волковăпа Анджела Герасимова культура пурнăçне хыçала хăварнăранпа, урăх çул суйласа илнĕренпе нумай çул иртнĕ ĕнтĕ. Анчах та юрлама, гитарăпа калама манман-ха, культурăра "малтанхисем" çуккине çирĕплетсе пачĕç.
Фестиваль чăнахах та çỹллĕ шайра иртнине залра ларакансем тăвăллăн алă çупса çирĕплетрĕç. Жюри те фестивальпе кăмăллă юлчĕ, кашнинех парнепе тата грамотăсемпе чысларĕ, ăнăçу сунчĕ, "Сюрбеево" ООО ертỹçине Ремис Мансуров спонсора тав турĕ.
Н.АРХИПОВА.
Источник: "Каçал Ен"