12 апреля 2016 г.
Кĕçех 2002-2003 çулсенче çуралнă шкул ачисем хушшинчи республикăри баскетбол вăййин ăмăртăвĕсем вĕçленĕç. Асăннă ăмăртусене районти спортсменсем хастар хутшăнчĕç, малти вырăнсене тивĕçрĕç.
Республикăри районсем хушшинчи тĕлпулусем виçĕ зонăра иртрĕç. Пирĕн каччăсемпе хĕрсем вара Канаш хулинчи ăмăртусене ăнăçлăн вĕçлесе малалли тапхăра тухрĕç. Çурма финалти вăйăсем те Канашрах иртрĕç. Шупашкар, Пăрачкав командисене парăнтарса Комсомольскисем çĕнтерỹçĕ ятне çĕнсе илчĕç. Пирĕн командăсем Çĕнĕ Шупашкарсене те парăнтарса мала тухрĕç. Апрель уйăхĕн вĕçĕнче Шупашкарта финал вăййисем пулса иртмелле. Унта Шупашкарпа Улатăр хулисен ушкăнĕсемпе пĕрле пирĕн районти спортсменсем те мала тухассишĕн тупăшĕç.
Баскетбол вăййи пирки сăмах хускатнă май, нумаях пулмасть республика шайĕнче аслăрах ачасем хушшинчи "КЭС-Баскет" чемпионачĕ те пирĕн спортсменсемшĕн ăнăçлă пулнине асăнмалла. Чемпионат вăхăтĕнче Комсомольски 2-мĕш вăтам шкулĕн каччисемпе хĕрĕсем районсем хушшинче çĕнтерỹçĕсем пулнине тепĕр хутчен çирĕплетрĕç. Финала тухмалли вăйăра çеç каччăсем Улатăр командине пĕр очко выляса ячĕç. Хĕрачасем те çурма финалта Сĕнтĕрвăррисене çĕнтереймерĕç. Комсомольски 2-мĕш вăтам шкулĕн командисем юлашки 3-4 çулта асăннă чемпионатра малтисен шутĕнче пулни уйрăмах савăнтарать. Кунта вара физкультура учителĕпе тренерăн витĕмĕ пысăк. Унта маларах Юрий Боровков тăрăшнă, баскетбол, волейбол вăййисен ăмăртăвĕсенче хăй хатĕрленĕ спортсменсемпе яланах малтисен йышĕнче пулнă.
"Кĕтне" физкультурăпа спорт комплексĕнче те баскетбол секцийĕ ĕçлет. Ăна Сергей Остапиенко тренер ертсе пырать. Сергей Викторовичăн баскетбол вăййине районта аталантарас ĕçри тỹпи пысăк. Тренировкăсене те кунсерен 30-35 ача сиктермесĕрех çỹрет, район центрĕнчен çеç мар, ытти ялсенчен те спортсменсем пухăнаççĕ.
В.ГАВРИЛОВ.
Источник: "Каçал Ен"