29 марта 2016 г.
Çурхи ака-суха ĕçĕсене юсавлă техникăпа çеç пахалăхлă пурнăçлама пулать. Çакна ял хуçалăх предприятийĕсен ертỹçисемпе специалисчĕсем те, механизаторсем те питĕ лайăх ăнланаççĕ. Пур çĕрте те юсав ĕçĕсем пыраççĕ, патшалăх техника надзорĕн специалисчĕсем комиссисемпе çула тухаççĕ.
Техника тĕрĕслевне "Слава картофелю" тата "Комсомольские овощи" агрофирмăсенчен пуçласси йăлана кĕнĕ ĕнтĕ. Çавна май мартăн 24-мĕшĕнче комисси 34 техникăна тĕрĕслерĕ. Хăй тĕллĕн куçакан техника тата кăкарса ĕçлемелли агрегатсем паян тесен паян ĕçе тухма хатĕр. Унсăр пуçне акас лаптăксем ỹснĕ май, фирма Минскри трактор заводĕнче тухакан МТЗ-1025, МТЗ-82 тракторсем, AGRICOLA сеялка туяннă, планра - çĕрулми кăларакан агрегатпа тыр-пул пуçтаракан комбайн илесси. Патшалăх техника надзорĕн тĕп инспекторĕ Сергей Кокарев, ял хуçалăхпа экологи пайĕн тĕп агрономĕ Шамиль Зейнутдинов, агрофирмăсен инженерĕ Александр Павлов, Рушан Салеев механик техника хатĕрĕсем çинче пысăк кăлтăксемех асăрхамарĕç. Çавăнпа пĕрлех агрофирмăсенче ятарлă гараж стоянкисем, юсав ĕçĕсене ирттерме мастерскойсем, техникăна уçă тата хỹтĕ вырăнта упрама площадкăсем пуррине палăртса хăвармалла. Чи пахи вара - механизаторсен йышĕ пысăк пĕлỹллĕ, техникăна лайăх пĕлекен пулни. Паянхи куна агрофирмăсен механизаторĕсем ял хуçалăх техникине йĕркене кĕртсе çитерессишĕн тăрăшаççĕ, 2016 çулхи çуракине вăхăтра ирттерме хатĕрленеççĕ. Кăçал вара агрофирмăсен тĕллевĕсем пысăк. Вĕсем 740 гектар çĕрулми, 250 гектар донник, 2300 гектар пĕрчĕллĕ тата пăрçа йышши культурăсем, 20 гектар хĕрлĕ чĕкĕнтĕр, 20 гектар кишĕр, 5 гектар купăста лартма палăртнă.
Кĕçех ытти ял хуçалăх кооперативĕсенче, колхозсенче, фермер хуçалăхĕсенче те техосмотр иртĕ. Техникăна кирлĕ пек хатĕрлемелле, водительсемпе механизаторсен яваплăхне ỹстермелле. Юсавлă техника хăрушлăх та кăларса тăратмĕ, ĕç тухăçлăхне те ỹстерме пулăшĕ.
С.КОКАРЕВ,
патшалăх техника надзорĕн районти аслă инспекторĕ.
Источник: "Каçал Ен"