25 марта 2016 г.
Истори, право, обществознани тата экономика предмечĕсене ертсе пыракан вĕрентекенсем иртнĕ эрнере Аслă Чурачăк вăтам шкулне хăйсен черетлĕ фестивальне пуçтарăнчĕç. Фестивале кашни çулах историри пĕр-пĕр паллă пулăмпа çыхăнтараççĕ. 2015 çула Аслă Çĕнтерĕве 70 çул çитнине халалланăччĕ, кăçал - XIX ĕмĕр пуçламăшĕнче пулса иртнĕ декабристсен пăлхавĕн юбилейне.
О.Г.Сорокина (Хырай Ĕнел вăтам шкулĕ), Р.Д.Тимаев (Кĕçĕн Çĕрпỹел вăтам шкулĕ), И.В. Пильщиков (Урмаел вăтам шкулĕ) вĕрентекенсем уçă уроксем ирттерчĕç. Çамрăк вĕрентекенсем фестивале тĕплĕн хатĕрленнĕ, шкул ачисене те, ытти шкулсенчен килнĕ вĕрентекенсене те кăсăклă пулчĕ. Аслă Чурачăксем те хăйсен опычĕпе паллаштарчĕç. Татьяна Юрьевна Мальчикова, Галина Федоровна тата Владимир Васильевич Никифоровсем декабристсене халалласа мероприяти йĕркелесе ирттерчĕç. Унта аслă классенче вĕренекенсем хутшăнчĕç.
Фестивальте шкул ачисен тата вĕрентекенсен творчество ĕçĕсен конкурсне йĕркеленĕ. Вĕсене Тăван çĕршывăн хастар чĕреллĕ ывăлĕсене - декабристсене тата вĕсен мăшăрĕсене халалланă. Вĕрентекенсем хушшинче О.Г.Сорокина çĕнтерỹçĕ ята тивĕçрĕ. Призерсем - Г.А. Белкова тата Л.А.Катмакова. Ачасенчен çĕнтерỹçĕсем - Аделияпа Адения Купировăсем (Комсомольски 2-мĕш вăтам шкулĕ) тата Виктория Воронова (Нĕркеç вăтам шкулĕ), призерĕсем - Анастасия Исаева (Хырхĕрри тĕп шкулĕ), Анастасия Горбунова (Комсомольски 1-мĕш вăтам шкулĕ), Диля Минуллина (Урмаел вăтам шкулĕ).
Тĕлпулура вĕрентекенсем çĕнĕлĕхсем çинчен те калаçрĕç. Паллах, пĕр-пĕрин опычĕпе, курнă çĕнĕ мелсемпе вĕрентекенсем малашне хăйсен кулленхи ĕçĕнче усă курасси куçкĕрет.
Г.БЕЛКОВА.