22 марта 2016 г.
Мартăн 17-мĕшĕнче Чăваш Республикин Спорт министерствин ачасемпе çамрăксен Çĕнĕ Шупашкарти 3-мĕш спорт шкулĕнче регионсем хушшинче харăсах икĕ ăмăрту иртнĕ.
Вĕсем - 12-14 çулхи хĕрсем хушшинче ирĕклĕ майпа кĕрешсе тĕнче тата Европа чемпионкисен, пĕртăван Ольгăпа Наталия Смирновăсен призне çĕнсе илессишĕн тата федерацин Атăлçи округĕнчи кадет хĕрĕсем хушшинче мала тухассишĕн йĕркеленĕ турнирсем. Пухăннисене ЧР физкультурăпа спорт министрĕ Сергей Шелтуков, Чăваш Енри хĕрарăмсен ирĕклĕ майпа кĕрешекенсенчен пĕрлештернĕ командин аслă тренерĕ, Раççей тава тивĕçлĕ спорт мастерĕ Ольга Смирнова ăшшăн саламланă. Ку ăмăртусене çĕршыври 15 регионти вăйлă спортсменсем хутшăнни те пысăк пĕлтерĕшлĕ. Крым Республикинчен тăватă спортсмен хутшăннă. Пирĕн республика та хăйĕн вăйлă командине тăратнă. Чăваш Ен командинче - Раççейри тата тĕнчери ăмăртусен çĕнтерỹçисем. Ку ăмăртусене Асанкасси вăтам шкулĕн 8-мĕш класĕнче вĕренекен Виктория Калашникова та хутшăннă. Шупашкарти Юлия Мингазовăна, Мускаври София Резцовăна, Мари Элти Виктория Смеловăна парăнтарса Виктория кĕмĕл медаль çĕнсе илнĕ.
Эпир Викăна пысăк çитĕнỹпе саламлатпăр, малашне те ăнăçусем сунатпăр.
Г.ПЕТУХОВ,
тренер.
Источник: "Каçал Ен"