22 марта 2016 г.
Элпуç ял тăрăхĕнче мартăн 18-мĕшĕнче иртнĕ граждансен пухăвĕнче ял поселенийĕн ĕçĕ-хĕлĕн пĕтĕмлетĕвĕ, хыт каяшсене тирпейлесси, ял тăрăхне тирпей-илем кỹресси, ялсенчи çулсене тата вырăнти клуба юсасси, çĕнĕ урамсене хута ярасси пирки тата ытти ыйтусене сỹтсе яврĕç. Вырăнти ял тăрăхĕн пуçлăхĕ Владимир Гордеев Элпуç, Хирти Явăш, Хирти Выçли, Хирти Мăрат ял çыннисем умĕнче отчетпа тухса калаçрĕ. Унсăр пуçне пухăва район администрацийĕн экономика, çĕр тата пурлăх хутшăнăвĕсен уйрăмĕн начальникĕ Светлана Ульдина, РФ Пенси фончĕн районти управленийĕн ертỹçи Ирина Белобаева, районти тĕп больницăн терапевчĕ Лариса Галкина, Ильшат Сиразетдинов участковăй, "Дружба" ЯХПК председателĕ Ремис Мансуров хутшăнчĕç.
Владимир Николаевич хăйĕн отче-тĕнче нумай ыйту çинче чарăнса тăчĕ, çивĕчреххисене ял-йышпа сỹтсе яврĕ. Элпуç ял тăрăхне 4 ял кĕрет, кунта 461 хуçалăх, вĕсенчен 55-шĕ - дачăсем. 2015 çулта ял халăхĕн шучĕ 1304 çынпа танлашнă. Шел пулин те, ку тăрăхра демографи ыйтăвĕ питĕ çивĕч, пĕлтĕр 7 ача çуралнă пулсассăн, 22 çын вилнĕ.
Ял тăрăхĕн администрацийĕ çар учечĕшĕн те яваплă. Паянхи куна çар учетĕнче 392 гражданин тăрать, вĕсенчен 22-шĕ - призывниксем, 3-шĕ - запасри офицерсем. 2015 çулта 7 каччă çар тивĕçне пурнăçлама кайнă.
Урамсене тата ял тăрăхĕн территорине тирпейлĕ тытса тăрас тĕллевпе час-часах субботниксем иртеççĕ, ялсенчи масарсене тасатассине те кашни çулах йĕркелеççĕ. Ытти ялсенчи пекех, хыт каяша турттарма Патăрьелĕнчи "Полигон" ОООпа килĕшỹ тунă. Субботникĕсене ял администрацийĕ тата культура ĕçченĕсем йĕркелеççĕ-ха, анчах та халăх çав-çавах килти тĕрлĕ çỹп-çапа, çулнă курăксем таранах, таврана пăрахать. Килти тислĕке те çывăхри кỹлĕсене сĕтĕрнĕ тĕслĕх сахал мар. Мана, ялта çуралса ỹснĕскере, çакна пачах та пуçа хывма йывăр. Ара, тислĕкпе пахчара яланах удобрени пек усă курнă-çке, çунтарма май пур хыт каяшсене те таврана салатман, килти лаçсенчех кĕл тунă... Халĕ вара мĕнпур çỹп-çапа урама сĕтĕреççĕ, хăйсем пурăнакан вырăнах варалаççĕ.
Владимир Николаевич вырăнти ыйтусене татса пама "Дружба" ЯХПК правленийĕ, ял тăрăхĕн депутачĕсем, старостăсемпе пуçаруллă граждансем пулăшнине те уйрăммăн палăртса хăварчĕ. Çавăнпа пĕрлех малашне кашни хуçалăхран ирĕклĕ майпа 250-шар тенкĕ сулăм укçи пуçтарма калаçса татăлчĕç.
Район администрацийĕн пуçлăхĕн çумĕ Светлана Ульдина Комсомольски районĕн 2015 çулхи социаллă экономика аталанăвĕпе тĕплĕн паллаштарчĕ. Комсомольскинчен килнĕ представительсем хăйсен сферинчи тĕп ĕç-хĕл çинче чарăнса тăчĕç, халăха интереслентерекен ыйтусем çине тĕплĕн хуравларĕç, çĕнĕлĕхсем пирки каласа пачĕç.
Н.АРХИПОВА.
Источник: "Каçал Ен"