15 марта 2016 г.
Районта çуракине хатĕрленес ĕç вăй илсе пырать. Ял хуçалăхĕнче тăрăшакансем çак кунсенче кирлĕ чухлĕ паха вăрлăх хатĕрлеççĕ, çунтармалли-сĕрмелли материалсем туянаççĕ, удобрени кỹрсе килеççĕ. Механизаторсем автомашинăсене, тракторсене тата акмалли, сỹремелли, лартмалли ытти техникăна уя тухма хатĕрлеççĕ. Пур çĕрте те ĕç кал-кал пырать.
- Районти ял хуçалăх предприятийĕсемпе фермер хуçалăхĕсен, колхозсен ĕçченĕсем палăртнине вăхăтра пурнăçлас тĕллевпе тăрăшаççĕ. Кăçал çурхи ака ĕçĕсене 16531 гектар çинче пурнăçламалла, çав шутран пĕрчĕллĕ тата пăрçа йышши культурăсем 11813 гектар çинче пулĕç. Çĕрулмине 1190 гектар çинче лартма пăхнă, 743 гектар çинче куккурус акма палăртнă. 2763 тонна акмалли вăрлăх хатĕрленĕ. Паянхи куна илес пулсассăн, 2550 тонна вăрлăх кондициллĕ. Ку - 92,3 процент. Акана тухиччен пур вăрлăха та кондицие çитерме палăртнă.
Хуçалăхсем пурĕ 1300 тонна минераллă удобрени кỹрсе килнĕ, планпа 1860 тонна удобрени кирлĕ. Çураки ирттерме пĕтĕмĕшле 400 тонна çунтармалли-сĕрмелли материал кирлĕ пулсассăн, хальлĕхе 314 тонна туяннă. Хуçалăхсем 23 тонна бензин хатĕрленĕ, планпа килĕшỹллĕн тата 7 тонна кỹрсе килмелле. Пурнăçламалли ĕçсене çуракине тухиччен вĕçлемелле, - пĕлтерчĕ лару-тăрупа паллаштарса район администрацийĕн ял хуçалăх пайĕн тĕп агрономĕ Шамиль Зейнутдинов.
А.ЕФРЕМОВА.
Источник: "Каçал Ен"