11 марта 2016 г.
Нумаях пулмасть Чăваш кĕнеке издательствинче "Мамины, бабушкины и мои сказки" икĕ томлă ача-пăча кĕнеки 1500 экземплярпа пичетленсе тухнă. Асăннă кĕнекене асаттесемпе асаннесен, аннесемпе аттесен, ача сачĕсен воспитателĕсен тата ачасен произведенийĕсене кĕртнĕ.
Кĕнекене кун çути кăтартасси 2015 çул Раççейре Литература çулталăкĕ, Чăваш Енре К.В.Иванов çулталăкĕ пулнипе тỹрремĕнех çыхăннă. Пĕлтĕр Чăваш Республикин ачасен прависен уполномоченнăйĕ Вячеслав Рафинов республикăра "Мамины, бабушкины и мои сказки" творчество конкурсне пуçарнă. Асăннă конкурса ачасем, амăшĕсемпе ашшĕсем, асламăшĕсемпе аслашшĕсем хастар хутшăннă, юмах çине юмах çырнă. Конкурса хутшăнакансем хăйсен çемйисем, ачасем, мăнуксем, килти чĕрчунсем, йĕри-таврари çутçанталăк пирки çырнă. Кĕнекене, юмахсемсĕр пуçне, чăн историсене, вырăсла тата чăвашла сăвăсене кĕртнĕ. Юмах кĕнекисене Н.Андреева, С.Бритвина, В.Гончаров художниксем илемлетнĕ. Çĕнĕ кĕнекепе паллашма васкăр!
Источник: "Каçал Ен"