01 марта 2016 г.
Нумаях пулмасть Çĕнĕ Мăрат ял библиотекинче Раççейре - Кино, Чăваш Республикинче Ĕç çыннин çулталăкне Светлана Петрова библиотекарь савăнăçлă лару-тăрура уçрĕ. Вăл çулталăк хушшинче ирттерме палăртнă мероприятисен планĕпе паллаштарчĕ. Кăçалхи çулталăк тĕрлĕ-тĕрлĕ мероприятисемпе тулли пулĕ. Шкул ачисем ĕç çыннисемпе тĕл пулĕç.
Асăннă мероприятие Аслă Отечественнăй вăрçă "ачисем" те хутшăнчĕç: Николай Алексеевич Андриянов, Раиса Ивановнăпа Петр Васильевич Петровсем, Николай Алексеевич Борисов, "Хисеп Палли" ордена тивĕçнĕ Александра Васильевна Басникова. Вĕсем пуçтарăннисене хăйсен ачалăхĕпе паллаштарчĕç, мĕн пирки ĕмĕтленнине, мĕнле ĕçленине каласа пачĕç. Шкул ачисем вăрçă тата вăрçă хыççăнхи çулсем пирки интересленсех итлерĕç. Çавăнпа пĕрлех вулакансем "Çын ĕçпе илемлĕ", "Кино - асамлăх тĕнчи", тăван тавралăх музейĕнчи сăн ỹкерчĕксен куравĕпе паллашрĕç. 1-6-мĕш классенче пĕлỹ пухакан ачасем тĕрлĕ професси пирки литмонтаж хатĕрленĕ. Ачасем çĕршывăн халăх хуçалăхĕнче пысăк пĕлтерĕшлĕ вырăн йышăнакан профессисем пирки хавхалансах каласа пачĕç. "Краеведушка" кружока çỹрекенсем кинематографи историне кĕскен каласа пачĕç.
Краеведени музейĕн заведующийĕ Ирина Сергеевна "Заря" колхоз ĕçченĕсен кун-çулĕпе паллаштарчĕ. Ял хуçалăх производствинче пысăк çитĕнỹсем тунă 30 çын тĕрлĕ орденсене тивĕçнĕ.
Çĕнĕ Мăрат ялĕ маттур ĕçченĕсене манмасть, вĕсемпе мухтанать.
С.ПЕТРОВА,
библиотекарь.
Источник: "Каçал Ен"