01 марта 2016 г.
Анне телейне кашни хĕрарăм курма ĕмĕтленет. Анчах çут ĕмĕте тепĕр чух ачан хавшак сывлăхĕ тĕксĕмлетет. Çулсерен пин-пин ача чирлĕ çуралать. Ача чирлĕ е сывă çураласси çутçанталăкран, пирĕн пурнăç йĕркинчен нумай килет.
Чылай чух вĕсем кỹрекен хăрушлăх пирки пĕлместпĕр те, шухăшламастпăр та. Уйрăмах витĕмлĕ сăлтавсем: хĕрарăм çулĕ, тухтăр сăнавĕсĕр сипленни, инфекци чирĕсем пурри, эрех ĕçни, пирус туртни, çителĕксĕр апатланни, професси тата экологи сиенĕ, кĕтмен çĕртрен çие юлни.
Çулсем иртнĕ май çын организмĕ, арлăх клеткисем ватăлаççĕ, вĕсенче вара пулас ача валли кирлĕ генетика материалĕ упранать. 18-35 çул - ача çуратмалли чи лайăх вăхăт. Çамрăкрах е аслăрах хĕрарăмсем çие юлнă тапхăра йывăр ирттереççĕ, чирлĕ ача çуралас хăрушлăх та пысăк.
Тухтăр сăнавĕсĕр ĕçнĕ эмелĕн сиенĕ пысăк. Тĕслĕхрен, онкологи чирĕнчен сиплекен эмелсем, антибиотик ушкăнне кĕрекеннисенчен хăшĕ-пĕри. Çавăн пекех контрацептивсемпе асăрхануллă пулмалла, вĕсемпе усă курнă чух çие юлни уйрăмах хăрушă, чĕре, юн тымарĕ, ар тытăмĕ сиенленнĕ ача çуралма пултарать. Малтанхи 9-10 эрнере ĕçни уйрăмах хăрушă: алкоголь варти пепкене вĕлерме те пултарать. Кунсăр пуçне ĕçекен ашшĕ-амăшĕн ачи пĕчĕк çуралать, ăс-тăн, кĕлетке аталанăвĕ юлса пырать, шалти органсем сиенленеççĕ.
Туртакан çынпа пĕр пỹлĕмре пулни те ача кĕтекен хĕрарăмшăн хăрушă. Хăй туртмасассăн та пирус тĕтĕмĕ ачан юн çаврăнăшне пăсать, шалти органсен йĕркеленĕвне аркатать, пепке вăхăтсăр çуралма пултарать.
Çие хăварас текен хĕрарăмăн сиенлĕ йăласенчен хăпмалла, витаминсемпе пуян çимĕçпе апатланмалла, сывă пурнăç йĕркине тытса пымалла.
А.КОЗЛОВА,
гинеколог.
Источник: "Каçал Ен"