01 марта 2016 г.
Февралĕн 27-мĕшĕнче районти культура центрĕнче СССР халăх артисчĕ Вера Кузьмина ячĕпе "Чĕрĕ сăмах" конкурс иртрĕ. Конкурса маттур та пултаруллă ачасене, çамрăксене, çынсене тупса палăртас тĕллевпе йĕркеленĕ. Конкурса хутшăнакансен пултарулăхне Чăваш Республикин тава тивĕçлĕ артисчĕ, К.Иванов ячĕллĕ Чăваш патшалăх академи драма театрĕн артисчĕ, Валерий Карпов ентеш хакларĕ.
- Чи матуррисене палăртма чăннипех те çăмăл пулмарĕ, кашниех конкурса тĕплĕн хатĕрленнĕ. Çакă вара мана пушшех те савăнтарать, - терĕ хавхаланса Валерий Карпов çĕнтерỹçĕсене саламланă май.
Ачасенчен Диана Громова (Хирти Выçли) "Поэзи" номинацире, Никита Голландцев (Хирти Сĕнтĕр) "Проза" номинацире чи маттуррисем пулчĕç. Арина Галкина (Хирти Выçли), Александра Юдина (Александровка) хăйсен ỹсĕмĕсенче - чи пултаруллисем. Сăмахран, Александра сцена çинче вуланă сăввине хăех çырнă. Çавăн пекех Софья Николаева (Кĕçĕн Çĕрпỹел), Татьяна Афанасьева (Хирти Мăнтăр) Дипломсене тивĕçрĕç.
Конкурсра Александровка культура çурчĕн театр коллективне Хисеп грамотипе чысларĕç. Йăлмахва культура çурчĕн ĕçченĕ Руфина Смирнова "Тăлăх хĕр ача" сăвва чуна пырса тивмелле вуларĕ.
"Чĕрĕ сăмах" конкурс çĕнтерỹçисем Шупашкар хулинчи Наци библиотекинче йĕркелекен концерта хутшăнаççĕ.
М.ИЛЛАРИОНОВА.
Источник: "Каçал Ен"