19 февраля 2016 г.
2015 çулхи пĕрремĕш кварталта Пĕтĕм Раççейре бизнес-çырав (предпринимательлĕхĕн пĕчĕк тата вăтам субъекчĕсен ĕçĕ-хĕлĕн статистика тĕлĕшĕнчи тулли сăнавĕ) пуçланчĕ. Пысăк тĕпчевĕн тĕллевĕ - экономикăн асăннă секторĕн аталанăвне пур енлĕн сăнласси.
Тулли сăнав девизĕ - "Пысăк çĕршывăн пĕчĕк бизнесĕ", ăна бизнес, патшалăх тата пĕтĕм общество интересĕсене тĕпе хурса ирттереççĕ. Асăннă мероприяти предпринимательлĕхĕн пĕчĕк тата вăтам секторĕнчи лару-тăрăвĕн чăнлăхне уçăмлатать, цифрăсем тĕрĕссине палăртаççĕ. Пĕтĕмлетỹсем çĕршыври пĕчĕк тата вăтам бизнеса туллин те объективлă кăтартса пани хуçалăх субъекчĕсене субсидипе тата хăйсен ĕç-хĕлне аталантармалли ытти ресурспа ятран тивĕçтерме май парать.
Унсăр пуçне бизнес хăй те рынок тытăмĕ мĕнлине туйса илет, хăш енĕпе малалла ăнтăлмаллине палăртса хурать. Малашлăх çулне ăнăçлă такăрламашкăн харпăр хăй тĕллевĕсене Раççейри кăтартусемпе танлаштармалла. Çакнашкал хаклав Анăçри çĕршывсенчи предпринимательсемшĕн чăннипех пĕлтерĕшлĕ, вĕсем официаллă статистика информацийĕпе пуçаруллă усă кураççĕ.
Районти предпринимательсене асăннă мероприятие хутшăнма йыхравлатпăр. Эпир Раççейре ĕçлесе пурăнатпăр, пуласлăха та Тăван çĕршывпах çыхăнтаратпăр, апла тĕллевсене пурнăçа кĕртнĕ чухне патшалăх саккунĕсене тĕпе хумалла.
Аса илтеретпĕр, ĕç-хĕлпе çыхăннă кăтартусене 2016 çулхи ака уйăхĕн 1-мĕшĕччен памалла.
Экономика çыравне предпринимательлĕхĕн пĕчĕк субъекчĕсен пурин те хутшăнмалла. Вăйра тăракан саккунсемпе килĕшỹллĕн статистика отчетне памалли йĕркерен пăрăнма юрамасть. Тулли сăнава хутшăнассинчен пăрăнакан должноçри çынсен - 10 - 20 пин, юридици сăпатĕнче тăракансен 20-70 пин тенкĕ штраф тỹлеме тивет.
Пирĕн муниципалитетри, çавăн пекех Чăваш Енри пĕчĕк тата вăтам бизнесăн лару-тăрăвĕ пирки тулли те тĕрĕс информаци пухасси çырава хутшăнакансен пуçарулăхĕпе тỹрремĕнех çыхăннă.
Росстат сăнава хутшăннисен кăтартăвĕсене тата вĕсемпе çыхăннă информацие хỹтĕлеме конфиденциаллăхпа тивĕçтерме шантарать тата асăннă мероприятие фискальлĕ пулмасса гарантилет.
Сăнав формисене йĕркелессипе çыхăннă ыйтусене 5-12-96 телефонпа шăнкăравласа пĕлме е электронлă адреспа P21SemenovaLY@gks.ru уçăмлатма пултаратăр.
Тулли сăнавпа çыхăннă мĕнпур информацие Чăвашстат сайтĕнче (chuvach.gks.ru) "Пĕчĕк тата вăтам бизнесăн 2015 çулхи ĕçĕ-хĕлне туллин тишкерни" пайра вырнаçтарнă.
Н.АЛЕКСАНДРОВА.
Источник: "Каçал Ен"