05 февраля 2016 г.
Февралĕн 2-мĕшĕнче районта ĕçлĕ визитпа ЧР Патшалăх ветеринари службин ертỹçи, республикăри тĕп патшалăх ветеринари инспекторĕ Сергей Иванович Скворцов пулнă.
Чи малтанах вăл район администрацийĕн пуçлăхĕпе Алексей Самаркинпа тĕл пулнă. Тĕл пулăва ял хуçалăх пайĕн начальникĕ Илдус Миннетуллин та хутшăннă. Çавра сĕтел хушшинче пуçтарăннисем сĕтĕн техника регламентне пăхăнас, сĕт пуçтарас хака республикăри вăтам хакпа тан тытса тăрас ыйтусене сỹтсе явнă. Çавăнпа пĕрлех лейкоз вирусĕ ернĕ ĕнесене тупса палăртассипе РФ Ял хуçалăх министерствин приказĕпе килĕшỹллĕн ирттермелли мероприятисем çинче чарăнса тăнă.
Малалла пуçлăхсем районти ветеринари специалисчĕсемпе канашлу ирттернĕ. Канашлăвăн пуçламăшĕнче специалистсене ветстанцин çĕнĕ начальникĕпе Сергей Алексеевич Васильевпа паллаштарнă. Вăл малтан Чăваш Енри Госветслужбăн патшалăх ветеринари надзорĕн аслă инспекторĕ пулса ĕçленĕ.
Канашлура мăйракаллă шултра выльăха лейкоз чирĕнчен сыватасси, çапкаланчăк, урнă чĕрчунсен шутне чакарассипе мероприятисем ирттересси, ветеринари тата санитари докуменчĕсене вăхăтра хатĕрлесси çинче те уйрăммăн чарăнса тăнă.
Сергей Иванович Г.М.Хайртдинов фермер хуçалăхĕн ĕçĕ-хĕлĕпе паллашнă. Паянхи куна асăннă хуçалăх ял хуçалăх предприятийĕсенчен, халăхран кашни кун 30-40 тонна сĕт пуçтарать. Кунта пастеризациленĕ сĕте пакетласа хатĕрленине, хăйма, кефир тăвассине йĕркеленине, вырăнти лавккасемсĕр пуçне республикăри пысăк магазинсенче вырăнти продукци сутăннине асăнса хăварма та кăмăллă.
Çавăнпа пĕрлех ĕçлĕ ушкăн Тукай Мишер ялĕнчи Р.Г.Айсын фермер хуçалăхĕн выльăх-чĕрлĕх пусакан цехĕпе тата каяшсене тирпейленипе кăсăкланнă. Сергей Скворцов выльăх пусакан пунктра ветеринари тата санитари правилисене пăхăннипе паллашнă.
(ХАМĂР ИНФ.).
Источник: "Каçал Ен"