12 января 2016 г.
Январь уйăхĕнчи канмалли кунсенче районта тĕрлĕ мероприятисем иртрĕç. Нумайăшĕ спорт ăмăртăвĕсенче тупăшрĕ, ыттисем культура мероприятийĕсене хутшăнчĕç. Ачасем, аслăрах çулхисем йĕлтĕрпе, конькипе ярăнса, хоккейла, футболла, волейболла выляса киленчĕç. Чи маттуррисем çĕнтерỹçĕсем пулса тăчĕç.
Январĕн 3-мĕшĕнче "Кĕтне" физкультурăпа спорт комплексĕнче район администрацийĕн пуçлăхĕн Кубокне çĕнсе илессишĕн волейбол турнирĕ иртрĕ. Турнира хутшăннă 6 команда мала тухассишĕн тупăшнă. Хĕрỹ тупăшура район администрацийĕн команди мала тухнă. Иккĕмĕш вырăнта - вĕренỹ учрежденийĕсен ертỹçисен команди. Ял хуçалăх предприятийĕсен ертỹçисен команди виççĕмĕш вырăна тухнă.
Январĕн 4-мĕшĕнче Е.Н.Петрейкина ячĕпе йĕркеленĕ хĕрсен волейбол турнирĕнче Комсомольски 2-мĕш вăтам шкулĕн командине çитекенни пулман. Вĕсем пурне те парăнтарса 1-мĕш вырăна тухнă. Патăрьелсем - иккĕмĕшсем, Урмаелсем виççĕмĕшсем пулнă. Асăннă турнира 10 команда хутшăнни те унăн сумне ỹстерет.
Çĕнĕ Кипеç ялĕнче январĕн 5-мĕшĕнче Николай Можаев спортсмена халалласа хоккей турнирĕ иртнĕ. Унта тăватă команда хутшăннă. Хĕрỹ вăйăсенче хуçасем - Çĕнĕ Кипеçсем - пурне те çĕнтернĕ. Нĕркеçсен команди - иккĕмĕш, Асанкассисем виççĕмĕшсем пулнă.
Физкультурăпа спорт комплексĕн стадионĕнче ирттернĕ мини-футбол вăййине аслисем те, çамрăксем те хастар хутшăннă. Çанталăк сивĕ пулнине пăхмасăрах спортсменсем çĕнтерỹшĕн тупăшнă. Комсомольски 2-мĕш вăтам шкулĕн выпускникĕсем пĕрремĕш вырăна тивĕçнĕ.
"Кĕтне" ФСК-ра кашни çулах Раштав турнирĕ йĕркелесси йăлана кĕнĕ. Кăçалхипе ăна 21-мĕш хут ирттерчĕç. Январĕн 6-мĕшĕнче йĕркеленĕ турнира чи маттур командăсем хутшăннă. Хĕрỹ тупăшура "Кубня" команда кубока тивĕçнĕ.
Январĕн 9-мĕшĕнче Нĕркеç ялĕнчи хоккей площадкинче Хирти Сĕнтĕр ял тăрăхĕн пуçлăхĕн Геннадий Ефремовăн кубокне çĕнсе илессишĕн турнир иртнĕ. Унта Çĕнĕ Кипеç, Нĕркеç, Асанкасси ялĕсен командисем хутшăннă. Ăмăртура Çĕнĕ Кипеçсене çитекен пулман. Вĕсем пĕлтĕр тивĕçнĕ кубока алăран вĕçертмен. Нĕркеçсем - иккĕмĕш, Асанкассисем виççĕмĕш вырăнсене йышăннă.
(ХАМĂР ИНФ.).
Источник: "Каçал Ен"