26 декабря 2015 г.
Вĕсене декабрĕн 22-мĕшĕнче "Год обезьяны на старте" шоу-программăпа централизациленĕ клуб тытăмĕн ĕçченĕсем уçрĕç. Вырăнти артистсем куракансене пĕр самантлăха та тунсăхлама памарĕç, шỹтлерĕç, юрă-ташăпа савăнтарчĕç. Уйрăмах вĕсем хатĕрленĕ "Качака çулне ăсатма хатĕрленетпĕр" видеоролик пурне те ăша тыттарсах култарчĕ.
Çĕнĕ çула халалланă эстрада концертĕнче "Кубняночка" ансамбле çỹрекенсем, Мария Долгова, Марина Волкова, Лариса Носова, Виктор Кокшин, "Островок" хореографи ушкăнĕ, централизациленĕ клуб тытăмĕ çумĕнчи ансамбль курма килнĕ халăха лайăх кăмăл парнелерĕç.
Хĕл Мучипе (Владимир Павлов) Юрпике (Мария Илларионова) шỹтпе хăйне евĕрлĕ саламлани те залри халăха килĕшрĕ. Килес çул хуçин Упăтен ролĕнче вара Алевтина Трофимова пулчĕ. Иртекен çулталăка ăсатма вăхăт çитсе пынă май сцена çине Элпуç ял тăрăхĕнчен килсе çитнĕ Качака та тĕрлĕ юмахсен геройĕсемпе пĕрле тухрĕ.
Культура ĕçченĕсем шоу-программăна курма кĕнĕ билетсемпе лотерея та йĕркелерĕç. Уявăн тĕп парнин хуçи Е.С.Дьяконова пулса тăчĕ.
Л.ШУРЯШКИНА.
Источник: "Каçал Ен"