26 декабря 2015 г.
Декабрĕн 23-мĕшĕнче Мускавра Раççей Президенчĕ Владимир Путин ирттернĕ Патшалăх Думин ларăвне Чăваш Ен Пуçлăхĕ Михаил Игнатьев хутшăннă. Ĕçлĕ ларăва вĕренỹ сферине çĕнетес ыйтупа çыхăнтарнă. Владимир Путин хăйĕн ум сăмахĕнче Раççей шкулне тĕнчери чи чаплă шкул тума чĕнсе каланă. Ларура паянхи шкулсенче ачасене ытларах электронлă майпа пĕлỹ парас ыйту çине тимлĕх уйăрнă. Вĕрентекенсен пĕлỹ шайне ỹстерсе пымаллине, хутпа сахалтарах ĕçлемеллине палăртнă. Чи çивĕч ыйту - шкулсенче икĕ тата виçĕ сменăпа вĕрентессине пăрахăçласси.
"Палăртнă пур ыйтăва та туллин пурнăçлатпăр. Республикăри пур ача та хальхи пурнăçпа тỹр килекен шкулсенче вĕренĕ. Икĕ сменăпа вĕрентессине пăрахăçлăпăр", - тенĕ Чăваш Ен Пуçлăхĕ Михаил Игнатьев. Çак сăмахсене çирĕплетсе федерациллĕ шайри ертỹçĕсем те Чăваш Республикинчи вĕрентỹ сферин ĕçне пысăка хакланă.
Сергей Кравцов, вĕренỹ тата наука сферин асăрхавĕн федераци службин ертỹçи:
"Чăваш Республикин ертỹлĕхĕ, регион пуçлăхĕ Михаил Игнатьев, вĕренỹ министрĕ республикăра пĕрлехи патшалăх экзаменĕсем çỹллĕ шайра тата тĕрĕс иртчĕр тесе кирлĕ йышăнусем тунă. Экзаменсем тĕрĕс иртсессĕн, ачасем тăрăшса вĕренме тытăнаççĕ. Çакă вĕрентекенсене те ĕçре яваплăрах пулма хистет. Пирĕншĕн пĕрлехи патшалăх экзаменĕсем çеç мар, 9-мĕш класс хыççăнхи пĕтĕмлетỹ аттестацийĕ те тĕрĕс иртни пĕлтерĕшлĕ".
Источник: "Каçал Ен"