23 декабря 2015 г.
Умра - Çĕнĕ çул уявĕсем. Ăçта, мĕн курса киленмелле тата мĕнле канмалла? Чăваш Енре пурăнакансем тата хăнасем валли республикăра ятарлă портал хута янă - "Чăваш Енре канма вăхăт" (www.новыйгод21.рф).
Асăннă портал тĕрлĕ информаципе пуян. Çĕнĕ çул уявĕ йĕркелекен учрежденисен, конькипе ярăнса киленме май пур стадионсен адресĕсене, ĕç вăхăтне палăртнă. Çавăн пекех туристсене пĕлме санаторисемпе кану базисен списокĕ пур.
Çемьепе канма, ачасене Çĕнĕ çул представленийĕсем кăтартас тесессĕн те порталта кирлĕ информаци çителĕклĕ. Республикăра çĕнĕ çул уявĕсенче тĕрлĕ çĕрте канма пулать. Сăмахран, январĕн 3-мĕшĕнче Сĕнтĕрвăрринче пысăк уяв иртет. Январĕн 4-мĕшĕнче Етĕрне хулинче пулă тытма тата ухутана кайма пулать. Районта та уяв спорт мероприятийĕсемпе, кану каçĕсемпе пуян пулĕ.
Çĕнĕ çул уявне мĕнле ирттересси пĕтĕмпех сирĕнтен килет. Апла пулсассăн www.новыйгод21.рф портала кĕрсе информаципе паллашăр, хăвăрăн канăва пĕлсе йĕркелĕр.
Источник: "Каçал Ен"