16 марта 2013 г.
Райцентрти «У Веры» çĕвĕ цехĕнче ĕçлекен Вера Курицынана, Вера Ефимовăна тата Вера Мурзаевăна пĕлмен çын та çук пулĕ. Ылтăн алăллă ăстасем килекенсене вăр-вар пулăшу параççĕ. Виççĕшĕ те вĕсем çак ĕçре Çĕрпÿри çĕвĕçсем хатĕрлекен училищĕрен вĕренсе тухсан тăрăшма пикеннĕ.
Акă, Вера Ивановна 1974 çултанпах çĕвĕçре тимлет. Вера Алексеевнăпа Вера Васильевна вара çакăнта — 30 çула яхăн.
«Килекенсем кирек мĕнле япала çĕлеме саккас парсан та вĕсен ыйтăвĕсене тивĕçтерме тăрăшатпăр. Кама «çиçĕм» лартса памалла-и, тум-тир пĕчĕклетмелле-и, юбка-шăлавар çĕлемелле-и — çынсене нихăçан та каялла ямастпăр», — теççĕ опытлă çĕвĕçсем. Çĕленĕ япалисем вара пĕринчен пĕри çыпăçуллă, пăхса ытармалла мар. Ахальтен мар ĕнтĕ вĕсем патне пыракансен черечĕ яланах пысăк.
Источник: "Каçал Ен"