05 декабря 2015 г.
Ноябрĕн 27-мĕшĕнче Тукай Мишер вăтам шкулне районти çамрăк вĕрентекенсем семинара пуçтарăнчĕç.
Семинар вăхăтĕнче вĕрентекенсем уçă уроксем пачĕç. Р.Сафиуллин, Г.Ямалетдинова, Е.Антонова, Л.Галиуллина аслă вожатăй хăйсен ĕçри ăсталăхне кăтартма тăрăшрĕç. Вĕçĕнче З.Бахалдинова "Подарочный пакет своими руками" мастер-класс ирттерчĕ.
Семинарăн иккĕмĕш пайĕнче çамрăк педагогсем çавра сĕтел хушшине пуçтарăнчĕç. Назыря Ахметсафина ăсчахсен каларăшĕсемпе паллаштарчĕ, учитель ĕçĕнчи тĕп ыйтусем çинче чарăнса тăчĕ. Диагностикăпа консультаци центрĕн педагог-психологĕ И.Николаева çамрăк педагогсене ĕçре мĕн чăрмантарнине ăнланас тĕллевпе анкетировани ирттерчĕ. Çав ыйтăм вара çамрăкскерсене вĕрентỹ процесĕн календарне тума, урок тĕллевĕсене еплерех пурнăçлама йывăррине çиеле кăларчĕ. Квалификацие ỹстермелли чи лайăх мел тесе вĕсем хăй тĕллĕн вĕреннине, мастер-классене хутшăннине, ăспаруçăсем пулăшса пынине шутлаççĕ иккен.
Çавра сĕтелте çамрăк педагогсемпе ĕçлемелли плана, малашне пĕрле ĕçлес мелсене сỹтсе яврĕç.
И.НИКОЛАЕВА.
Источник: "Каçал Ен"