25 ноября 2015 г.
Республикăра "Раççей династийĕ" Пĕтĕм Раççейри иккĕмĕш конкурсăн регионти тапхăрĕ пырать. Ăна йĕркелекенсен тĕллевĕ - культурăпа ĕç династийĕсен чи лайăх йăлисене сарасси. Çапла майпа вĕсем республика аталанăвне пысăк тỹпе хывнă çынсемпе паллаштарасшăн.
Конкурса тăратнă ĕçсене виçĕ номинаципе хаклаççĕ: "Ĕмĕртен ĕмĕре" (çĕршывра ĕçлесе пурăннă пĕр йăхри темиçе ăру представителĕсем çинчен), "Профессири çемье" (пĕр професси сферинче вăй хуракан ĕç династийĕ), "Çĕршыв мăнаçлăхĕ" (Раççейре палăрнă династи представителĕсем). Конкурса тăратакан материалсенче ирĕклĕ майпа çырнă эссе, изложени, сăн ỹкерчĕксем пулмалла. Конкурс комиссийĕ çемье альбомĕсене те, видеороликсене те, йăх-несĕл йывăççине те, хаçат-журналта пичетленнĕ статьясене те йышăнать. Вĕсене заявкăпа пĕрле 2016 çулхи март уйăхĕн 10-мĕшĕччен ЧР Культурăпа национальноçсен ĕçĕсен министерствинче çак адреспа йышăнаççĕ: Шупашкар хули, Президент бульварĕ, 17-мĕш çурт, 629-мĕш пỹлĕм. Ыйтса пĕлмелли телефон 8(8352) 64-21-26.
Источник: "Каçал Ен"