21 ноября 2015 г.
Налук службинче ĕçлекенсем ноябрĕн 21-мĕшĕнче хăйсен професси уявне паллă тăваççĕ. Кăçалхи уяв вара ыттисенчен пĕлтерĕшлĕрех - Раççейре налук службине туса хунăранпа 25 çул çитрĕ. Çак вăхăтра служба тĕрекленсе вăй илме пултарнă.
Историе аса илес пулсассăн, чи малтанах кашни районтах налук инспекцийĕ пулнă, 2000 çултан 3-4 районтине пĕрлештерсе пĕрре туса хунă. Сăмахран, районти 2-мĕш номерлĕ налук инспекцийĕн ĕçченĕсем Патăрьел, Елчĕк, Шăмăршă, Комсомольски районĕсемпе ĕçлеççĕ. Тăватă районти тĕрлĕ организацисемпе учрежденисем, уйрăм предпринимательсем, уйрăм çынсем налуксене вăхăтра хывнине тĕрĕслеççĕ. Налук тỹлессинчен пăрăнакансене вырăна çитсе тупса палăртаççĕ. Çак тĕллевпе вĕсем тăтăшах тĕрлĕ рейдсем йĕркелеççĕ. Тăрăшса ĕçленине ỹсĕмсем çирĕплетеççĕ. Районти инспекцинче тăрăшакансем савăнăçлă уява чăннипех те лайăх кăтартусемпе кĕтсе илеççĕ. Çакна цифрăсемпе фактсем çирĕплетеççĕ. Районти 2-мĕш номерлĕ налук инспекцийĕ - республикăри чи лайăх та тухăçлă ĕçлекенсенчен пĕри. Çитĕнỹсемпе, ĕç-хĕлпе инспекци начальникĕ Вячеслав Александрович Антонов паллаштарчĕ.
- Инспекци кăçал çеç мар, чылайранпа лайăх ĕçлекенсен йышĕнче. Пирĕн кăтартусем çулран-çул ỹссех пыраççĕ. Сăмахран, 2015 çулхи 10 уйăхра федераци бюджетне 4 районпа пурĕ 514 миллион та 550 пин тенкĕ хывнă. 10 уйăхри кăтартусемпе эпир чи лайăх ĕçлекенсен йышĕнче. Комсомольски районĕпе илес пулсассăн, федераци бюджетне 21879 пин тенкĕ, республика бюджетне - 71 миллион тенкĕ, вырăнти бюджета 73280 пин тенкĕ хывнă. Пĕлтĕрхипе танлаштарсан 118,4 процент. Кунта, паллах, налук инспекцийĕн ĕçченĕсем те, налук тỹлекенсем те пĕр-пĕринпе килĕштерсе ĕçленине палăртмалла.
Пирĕн ỹсĕмсем чи малтанах налуксене мĕнле хывса пынинчен килеççĕ. Çавна май чи лайăх ĕçлекен организацисемпе предприятисене, уйрăм предпринимательсене палăртса хăвармалла. Акă, 2015 çулхи 10 уйăхра райпо 12 миллион та 873 пин тенкĕ хывнă, "Нур" предприяти - 8 миллион та 730 пин тенкĕ, "Слава картофелю" агрофирма - 5 миллион та 597 пин тенкĕ, В.С.Агамирян уйрăм предприниматель 4 миллион та 316 пин тенкĕ налук хывнă. Чĕчкен, Комсомольски ял тăрăхĕсенче пурăнакансем транспортшăн, пурлăхшăн, çĕршĕн палăртнă 2014 çулхи налуксене вăхăтра тỹленине палăртма та кăмăллă. Çавна май ыттисен вĕсенчен тĕслĕх илесчĕ. Шел пулин те, налуксене вăхăтра хывман организаци те чылай-ха. Хăшĕ-пĕрисем вара вăрттăн ĕçлеççĕ, саккуна пăхăнмаççĕ. Кун пек чухне вырăна çитсе тĕрĕслевсем ирттерни пулăшать. Ку енĕпе камераллă тĕрĕслев уйрăмĕн инспекторĕсем организацисене, уйрăм предпринимательсене тĕрĕслеççĕ. Çавна май кăçал 39 миллион та 300 пин тенкĕ шыраса илме йышăннă пулсассăн, хальлĕхе 29 миллион тенкине хыснана хывнă. Камераллă тĕрĕслевсене пула тỹлемелли налуксен 95 процентне шыраса илнипе эпир республикăри инспекцисем хушшинче 1-мĕш вырăн йышăнатпăр.
- Вячеслав Александрович, çитĕнỹсем чăннипех те курăмлă. Апла инспекцинче ĕçне чунтан парăннă çынсем ĕçлеççĕ пулĕ...
- Коллективра 50 çын тăрăшать. Вĕсенчен чылайăшĕ кунта нумай çул ĕçлет. Налук службипе пĕрле ĕçе кỹлĕннисем те пур, вĕсем - эпĕ тата информаципе аналитика уйрăмĕн начальникĕ Вера Лукиянова. Çавăн пекех пĕтĕмĕшле пулăшу уйрăмĕн начальникĕ Татьяна Чапрасова, ертсе пыракан инспектор Маргарита Кириллова 24 çул ытла, тухса çỹрекен уйрăмăн начальник ĕçĕсене пурнăçлакан Наталья Ильина, тĕп патшалăх инспекторĕ Алевтина Николаева 23 çул ытла, инспекци начальникĕн çумĕсем Геннадий Филиппов 22 çул, Надежда Поликарпова 21 çул, информаципе аналитика ĕçĕсен уйрăмĕн начальникĕн çумĕ Валерий Лисицын, Галина Русская специалист эксперт, Зиле Кудряшова 21 çул тăрăшаççĕ. Вĕсем - пысăк опытлă специалистсем. Çавна май тин çеç ĕçе кỹлĕнекен çамрăксене вĕрентсе пыраççĕ, ĕçлеме хăнăхтараççĕ.
- Эпĕ пĕлнĕ тăрăх, инспекци ĕçченĕсем обществăлла ĕçре те хастар. Тĕрлĕ спорт ăмăртăвĕсене, конкурссене, фестивальсене хутшăнма вăхăт тупаççĕ.
- Коллективра тăрăшакансем çав тери хастар, маттур, пултаруллă. Хăйсен ĕçне тивĕçлĕ туса пынă вăхăтрах спортзала çỹресе ỹт-пĕвне тĕреклетме, тĕрлĕ ăмăртăва хутшăнса ăсталăхне ỹстерме ĕлкĕреççĕ. Сăмахран, Раççей налук служби кашни çулах инспекци ĕçченĕсем хушшинче хĕллехи тата çуллахи спартакида ирттерессине йăлана кĕртнĕ. Кăçал ĕçченсем 14 тĕрлĕ спорт ăмăртăвне хутшăннă. Йĕлтĕрпе эстафета чупса, канат туртса 3-мĕш вырăнсене тухнă. Çавăн пекех шашкăлла, шахматла выляссипе те кăтартусем япăх мар. Маттур спортсменсем пирки уйрăммăн каласа хăварас килет. Зуфар Тимаев Чăваш Республикин тата Атăлçи округĕн чысне Раççей налук службисен Мускав хулинче йĕркеленĕ спартакиадинчи çитĕнĕвĕ çинчен эпир çырнăччĕ. Дмитрий Хлебников, Владимир Осипов - республикăри ăмăртусен çĕнтерỹçисем. Культура мероприятийĕсенче те пултаруллă ĕçченсем. Акă, профсоюз комитечĕн председателĕ Ирина Басникова кăçал "Чи лайăх налук инспекторĕ" республикăри конкурса хутшăнчĕ. Лайăххисен йышне кĕме пултарчĕ. Раççей налук служби 25 çул тултарнине халалласа инспекци ĕçченĕсем флешмоб конкурсне хутшăнчĕç. Ĕçпе канăва яланах çỹллĕ шайра йĕркелеме тăрăшнă, тăрăшатпăр та.
- Вячеслав Александрович, 25 çулхи уява мĕнле кăмăл-туйăмпа кĕтсе илетĕр? - ыйтрăм ертỹçĕрен.
- Раççей налук служби йĕркеленнĕренпе 25 çул çитни маншăн пысăк уяв. Эпĕ пĕрремĕш кунранах ĕçе кỹлĕннĕ. Çавна май служба аталанăвĕ пĕтĕмпех куç умĕнче. Кăçалхи уява Раççейре те анлăн паллă тăваççĕ. Республикăра ноябрĕн 23-мĕшĕнче уявлаççĕ. Чи пултаруллисене Хисеп грамотисемпе, Тав çырăвĕсемпе чыслаççĕ. Мускав хулинче РФ Президенчĕ Владимир Путин Раççейри пур инспекци начальникĕсемпе тĕл пулу ирттерет, анлă канашлăва хутшăнатпăр. Ноябрĕн 21-мĕшĕнче, уяв кунĕнче, пысăк концерт иртет. Вячеслав Александрович Антонов - ĕçе чунтан парăннă çынсенчен пĕри. 25 çул тăрăшаканскер, пысăк опытлă, анлă тавракурăмлă. Вăл 19 çул Канаш хулинчи налук службин инспекцине ертсе пынă, 6 çул пирĕн районта тăрăшать. Вячеслав Александровича ĕçри ỹсĕмсемшĕн вун-вун Хисеп грамотипе, Тав çырăвĕсемпе чысланă. Чи сумли вара - 2007 çулта тивĕçнĕ "Федераци налук службин хисеплĕ ĕçченĕ" паллă тата "Чăваш Республики умĕнчи тава тивĕçлĕ ĕçсемшĕн" медаль.
А.ЕФРЕМОВА
Источник: "Каçал Ен"