18 ноября 2015 г.
Чун-чĕре ăшшине парса çитĕнтернĕ ывăл-хĕр çĕршывшăн усăллă, ырă çын пулса çитĕннинчен аш-шĕ-амăшĕшĕн пысăк савăнăç та çук. Ывăлĕ салтак аттине тăхăнсан çывăх çыннисем савăнаççĕ. Ахальтен мар мĕн ĕлĕкех ваттисем: "Ывăл çуралсан салтака кайма юрăхлă пултăр", - тенĕ. Апла пулсассăн кашни каччăн салтак ятне илтмелле.
Йăлмахва ялĕнче пурăнакан Смирновсем патне çак кунсенче ырă хыпар çитнĕ. Сергей ывăлĕ службăра тăракан чаçрен Тав çырăвĕ янă. Сергей Красноярск тăрăхĕнчи Канск-12 хулинчи 69806-3 чаçре службăра тăрать. Вăл - сыхлав ротин аслă стрелокĕ. Çар тивĕçне тĕслĕхлĕ пурнăçлакан çамрăк ытти салтаксем хушшинче те хисеп, ырă ят çĕнсе илнĕ. Çар чаçĕн командирĕ В.Шишацкий çĕршыва хỹтĕлеме тивĕçлĕ ывăл çитĕнтернĕшĕн амăшне, Венера Геннадьевнăна, тав тăвать. "Сирĕн ывăл службăри кирек мĕнле ĕçе те вăхăтра, пахалăхлă пурнăçлать. Пуринпе те çăмăллăнах пĕр чĕлхе тупать. Ăна пурте хисеплеççĕ, ыттисемшĕн вăл - тĕс-лĕх", - пĕлтернĕ çырура.
Сергей Смирнов салтак аттине кăçал çулла çеç тăхăннă пулин те, хăйне лайăх енчен кăтартма пултарни амăшне çеç мар, Дима шăллĕне, тăванĕсене чунтан савăнтарнă. Аслашшĕ, Николай Кириллович, мĕн тери хĕпĕртенĕ тата. Вăл мăнукĕсем çĕршыва юрăхлă çын пулса çитĕннĕшĕн, пур çĕрте те хастар пулнишĕн савăнать, вĕсемпе мăнаçланать. Икĕ пĕртăван - Сергейпа Дима - мĕн пĕчĕкренех çар ретне тăма ĕмĕтленнĕ. Сергейĕн ĕмĕчĕ çулла пурнăçланнă, Дима вара вĕренсе пĕтернĕ хыççăн килес çул çара кайма хатĕрленет. Сергей Çĕнĕ Шупашкарти хими техникумĕнче вĕреннĕ, вăл - шофер.
Амăшĕ вара ывăлĕпе мухтанать, вăл киле таврăнасса чăтăмсăррăн кĕтет.
А.АНТОНОВА.
Источник: "Каçал Ен"