13 мая 2015 г.
Аслă Çĕнтерĕве 70 çул çитнĕ ятпа районта тĕрлĕ мероприятисем иртрĕç. ДОСААФăн районти уйрăмĕ те çак сумлă уяв ячĕпе майăн 8-мĕшĕнче Совет Союзĕн Геройĕсем К.М.Антонов, И.А.Кабалин, Г.Г.Габайдуллин, Г.Н.Чернов тата Ф.Н.Чернов çуралса ỹснĕ ялсенчи монументсемпе палăксем патне чечек кăшăлĕсем хурас тесе авточупу ирттерчĕ. Авточупăва районти Çамрăк Гварди маттурĕсем, Комсомольски 1-мĕш тата 2-мĕш вăтам шкулсен вĕренекенĕсем хутшăнчĕç. Вĕсем кашни ялтах митинга хутшăнакансене ентешсен паттăрлăхĕ, пархатарлă ĕçĕ, паттăрсене халалласа лартнă палăксен историйĕ пирки каласа пачĕç.
Александровка, Хирти Сĕнтĕр, Нĕркеç, Тукай Мишер, Çĕнĕ Мăрат, Асанкасси, Комсомольски ялĕсенче авточупăва ветерансем, шкул ачисем, вĕрентекенсем, ял поселенийĕсен пуçлăхĕсем ăшшăн кĕтсе илчĕç. Çамрăксем Аслă Çĕнтерỹ кунĕ чăннипех уявсен уявĕ пулнине туйрĕç.
Н.АРХИПОВА.
Источник: "Каçал Ен"