11 марта 2015 г.
Пĕтĕм тĕнчери хĕрарăмсен кунĕ уяв саламĕсемпе, парнесемпе çеç пуян мар. Уяв ячĕпе тĕрлĕ ăмăртусем йĕркелесси те йăлана кĕнĕ. Акă, иртнĕ кунсенче Комсомольски райповĕ "Кĕтне" физкультурăпа спорт комплексĕн стадионне йĕлтĕрпе чупма юратакансене пуçтарчĕ. Çамрăксем те, аслăрах çулхисем те, ваттисем те старта тухрĕç. Пухăннисене райпо совечĕн председателĕ Евгений Карпеев, район администрацийĕн спорт тата çамрăксен ĕçĕсен секторĕн заведующийĕ Юрий Боровков саламларĕç, ăмăртура ăнăçу сунчĕç.
Чи малтан старта паян райпора ĕçлекен тата тивĕçлĕ канури хĕрарăмсем тухрĕç. Кунта, паллах, чи маттуррисем финиша малтан çитрĕç. Г.Краснова - пĕрремĕш, Л.Осипова - иккĕмĕш, А.Харитонова финишра виççĕмĕш пулчĕç. Арçынсенчен вун-вун ăмăртура çĕнтернĕ спортсмен, Хирти Явăшра пурăнакан Анатолий Давыдов финишра пĕрремĕш пулчĕ. В.Пундяков, çулĕсене пăхмасăрах, иккĕмĕш вырăна, И.Ефимов виççĕмĕш вырăна тивĕçрĕç.
"Ăмăртусем йĕркелени сывлăха çеç мар, туслăха та çирĕплетет. Пĕрле пухăнса старта тухнине, йĕлтĕрпе ярăнса, чупса киленнине мĕн çиттĕр? Малашне те тăтăшах тĕл пуласчĕ", - терĕ спортсменсене тав туса Евгений Карпеев.
А.ЕФРЕМОВА
Источник: "Каçал Ен"