07 февраля 2015 г.
РФ Патшалăх Думи çĕнĕ саккун проектне йышăннă. Унпа килĕшỹллĕн штраф, алимент тỹлемен çынсене водитель правинчен вăхăтлăха хăтарĕç. Çак тивĕçе суд приставĕсем пурнăçлама пултарĕç. Тĕслĕхрен, алиментçă парăма 10 пин тенкĕрен ытларах тỹлемесен суд приставĕсем водитель правине туртса илме пултарĕç. Тỹлемен административлă штраф та 10 пин тенкĕрен иртсен правасăр тăрса юлас хăрушлăх пур.
Парăмçăн праваран хăтарнине ĕнентерекен постановлени илсен çав документа приставсене 5 кунран кая юлмасăр памалла. Çакна пурнăçламасан ăна 2,5 пин тенкĕ штраф тỹлеттерĕç. Кун пек чухне руль умне ларни правасăр çỹренипе танлашать: 30 пин тенкĕ штраф тỹлеттерĕç е 15 талăклăха ирĕксĕр хăварĕç. Парăмсене тỹлесенех правана тавăрса парĕç.
Источник: "Каçал Ен"