13 сентября 2014 г.
Н.И.Васильевăн фермер хуçалăхĕнче палăртнине яланах вăхăтра пурнăçлас тесе тăрăшаççĕ. Вĕсем вырма ĕçĕсене вĕçленĕ ĕнтĕ. Паянхи куна хиртен утта та, улăма та - пĕтĕмпех - пуçтарса кĕнĕ. Кăçал вĕсем 150 гектар çинче кĕрхи культурăсене акса хăварнă. Хăш-пĕр уйри тулă тата ыраш калчисем шăтса тухма та ĕлкĕрнĕ.
Унпа пĕрлех хуçалăхра кĕрхи çĕртмене вăхăтра тăвас тесе тимлеççĕ. Паянхи куна вĕсем 230 гектар çĕр сухаланă, ĕçе вĕçленĕ. Александр Антонов механизатор МТЗ-1231 тракторпа çĕре дискланă.
- Çĕре пĕр çул тарăн сухаласа хăваратпăр, тепĕр çулхине ĕçе дискаторпа пурнăçлатпăр. Çакă çĕр пулăхлăхĕпе уй-хир культурисен тухăçлăхне аван ỹстерме май парать, - паллаштарать ĕç-хĕлпе Николай Васильев фермер. Фермер хуçалăхĕнче тăрăшакансем кĕркунне пурнăçлама палăртнă ĕçсене хăвăртрах вĕçлес тĕллевпе кашни кунах ĕçе васкаççĕ. Çанталăк аван чухне тăрăшма та кăмăллăрах.
А.АНТОНОВА.
Источник: "Каçал Ен"