27 августа 2014 г.
Вырма ĕçĕсем вĕçленсе пыраççĕ. Августăн 26-мĕшĕ тĕлне районти ял хуçалăх предприятийĕсемпе фермер хуçалăхĕсенче, колхозсенче 13568 гектар çинчи пĕрчĕллĕ тата пăрçа йышши культурăсене пуçтарса кĕртнĕ, пурĕ 28957 тонна çапса тĕшĕленĕ, çакă - пухса кĕртмелли лаптăкăн 85,1 проценчĕ.
- Уй-хирте ĕç кал-кал пырать, çанталăк аван тăрсан вырмана районта паян-ыран вĕçлеме палăртатпăр. "Золотой колос", Атласкинăн, Хайртдиновăн, Ивановăн, Васильевăн фермер хуçалăхĕсенче, "Труд", "Дубрава" ял хуçалăх производство кооперативĕсенче, "Сюрбеево" ОООра çитĕнтернĕ тыр-пула пỹлмесене пуçтарса кĕртнĕ, ĕçе вĕçленĕ, - пĕлтерчĕ район администрацийĕн тĕп агрономĕ Шамиль Зейнутдинов.
Тыр-пул пуçтарса кĕртнипе пĕрлех хуçалăхсем кĕр тыррисем акма та тухнă. Ку ĕçе хальлĕхе 1242 гектар çинче пурнăçланă. Кĕр тыррисене пуринчен ытларах "Слава картофелю" агрофирмăра - 237 гектар, "Дружба" ЯХПК, "Сюрбеево" ООО - 160-шар гектар, "Восход" ООО -110 гектар, "Труд" ЯХПК - 182 гектар, "Урожай" колхоз 84 гектар çинче акнă.
- Хальлĕхе кĕр тыррисем акма 13 хуçалăх çеç тухнă, ыттисем васкамаççĕ. Çак ĕçе вăхăтра пуçăнасчĕ, малта пыракансемпе танлашасчĕ, - терĕ Шамиль Минуллович. Унпа пĕрлех хуçалăхсенче кĕрхи çĕртме тăвасси те кал-кал пырать. Ытлари кун тĕлне 4560 гектар çинче ĕçе пурнăçланă.
А.ЕФРЕМОВА.
Источник: "Каçал Ен"