26 февраля 2014 г.
Иртнĕ кунсенче Пĕтĕм тĕнчери куç курманнисен обществин Елчĕк тата Комсомольски районĕсенчи вырăнти уйрăмĕ Елчĕк тĕп библиотекинче конференци ирттернĕ. Унта куç курманнисен вырăнти уйрăмĕн председателĕ Г.И.Михайлов доклад тунă, ĕç-хĕлне çутатнă.
Конференцире библиотека çумĕнчи «Шурă туя» клубăн ĕçĕсемпе паллаштарса электронлă презентаци те кăтартнă.
Мероприятие хутшăнакансене саламласа Пĕтĕм Раççейри куç курманнисен обществин Чăваш Республикинчи организацийĕ çумĕнчи «Шевле» фольклор ансамблĕ юрă-ташăпа савăк кăмăл парнеленĕ.
Сăмах май, вырăнти уйрăм 2013 çулта ирттернĕ смотр-конкурсра республикăра 5-мĕш вырăн йышăннă. Ахальтен мар ĕнтĕ конференцие хутшăнакансем унăн иртнĕ çулхи ĕç-хĕлне «лайăх» хак парса хăварнă.
В.КОНСТАНТИНОВА.
Источник: "Каçал Ен"