12 февраля 2014 г.
Çуртсене хутса ăшăтмалли тапхăр вăхăтĕнче республикăра, шел пулин те, тĕрлĕ инкек-синкек пулать. Газ сĕрĕмĕпе сиенленнисем те пур, вут-çулăм та тухать. Нумай хваттерлĕ çуртсенчен чылайăшĕнче çут çанталăк газĕпе хутса ăшăтмалли уйрăм оборудовани вырнаçтарнă. Çакă меллĕ, çăмăл, çав вăхăтрах питĕ пысăк яваплăх та. Тĕп вырăнта — хăрушсăрлăх йĕркисене пăхăнасси. Нимле техникăна та тимлĕхсĕр хăварма юраманнине яланах асра тытмалла.
Сĕрĕм газĕпе сиенленесси, ытти инкек-синкек ан пултăр тесен Чăваш Ен Строительство министерстви çак ансат йĕркесене пăхăнма сĕнет:
— тĕтĕм тата вентиляци çулĕсем юсавлă пулнине сăнасах тăмалла, çав каналсене хупласа хума пултаракан япаласенчен тасатмалла;
— газ приборне ĕçлеттерме пуçличчен тĕтĕм тата вентиляци çулĕсенче туртăм пуррине тĕрĕслемелле;
— вентиляци çулĕсене хупламалла мар, газ оборудованийĕ ĕçлекен пÿлĕмре сывлăш яланах çителĕклĕ пулмалла;
— юсавсăр газ приборĕсемпе е вĕсенчен газ тухса тăрать пулсан усă курма юрамасть;
— газ приборĕсем çывăхне ачасене ямалла мар.
Газ шăрши тухнине туйсан газ приборĕсемпе тÿрех усă курма пăрахмалла, крансене хупмалла, чÿречесене е форточкăсене уçмалла, çулăм хыпса илесрен шăрпăк чĕртмелле мар, электричество приборĕсене, çутă çутма, электрошăнкăравпа усă курма юрамасть.
Туртăм пулмасан тата тĕтĕмпе вентиляци каналĕсем юрăхсăра тухсан, ытти кăлтăксем пулсан управляющи компанине е диспетчер службине 104 телефонпа шăнкăравласа пĕлтермелле.
Чăваш Ен Минстройĕн пресс-служби.
Источник: "Каçал Ен"