09 ноября 2013 г.
Налук инспекцийĕнче ĕçлекенсемшĕн халĕ — хĕрÿ тапхăр. Виççĕмĕш квартала вĕçлесе отчетсем йышăннă хыççăн вĕсем пур предприятисемпе организацисене çитсе тĕрĕслевсем ирттереççĕ.
Районти организацисемпе предприятисенче иртнĕ кунсенче районсем хушшинчи 2-мĕш "-лĕ налук инспекцийĕн службин тухса тĕрĕслев йĕркелекен пайĕн инспекторĕсем пулчĕç. Çак пая 2007 çултанпа Ирина Галкина ертсе пырать.
«Пирĕн тĕп тĕллев — налук тÿлессинчен тĕрлĕ меслетсемпе хăтăлма тăрăшакансен çулне пÿлесси, патшалăх хыснине ытларах укçа хывасси», — терĕ Ирина Николаевна. Сăмах май, кăçал вырăнти налукçăсем октябрĕн 22-мĕшĕ тĕлне 12 млн та 838 пин тенкĕ укçа шыраса илсе федераллă бюджета хывнă. Республика бюджетне — 37 млн та 353 пин тенкĕ.
Анна Кириллова, çак пайра нумаях ĕçлемест пулсан та, тăрăшулăхпа палăрнă. «Юнашар опытлă наставниксем пурри йывăрлăхсене çĕнтерме пулăшать», — терĕ пике.
Налукçăсем паянхи куна вырăнти бюджета 74 млн та 813 пин тенкĕ шыраса илсе хывнă. Лартнă тĕллевсене чыслăн пурнăçлаççĕ вĕсем.
М.ИЛЛАРИОНОВА.
Источник: "Каçал Ен"