05 октября 2013 г.
Октябрĕн 1-мĕшĕнче выльăх чирĕсемпе кĕрешекен районти станцинче Ваттисен кунне ирттерчĕç.
Чи малтанах пухăннисене станци начальникĕ Р.М.Велимухаметов, район администрацийĕн ял хуçалăх пайĕн тĕп зоотехникĕ К.Г.Гимальдинов ăшă сăмахсем каларĕç, ватăсене ырлăх-сывлăх сунчĕç. «Хăвăрăн ĕмĕрте эсир тем те курнă, пурнăçăн мĕн пур тĕрĕслевне чыслăн чăтса ирттернĕ», — терĕç вĕсем.
Ун хыççăн тивĕçлĕ канăва тухнисем районти патшалăх ветслужбинчи ветерансен совечĕн йышне суйларĕç, унăн председателĕ пулма В.Н.Чертынова шанчĕç.
Малалла мероприяти çавра сĕтел хушшинче иртрĕ. Ветерансем хăйсене сума сунăшăн, манманшăн, яланах тачă çыхăну тытнăшăн ертÿçĕсене тав турĕç.
В.НИКИФОРОВ.
Источник: "Каçал Ен"