14 августа 2013 г.
Нумаях пулмасть çул çитменннисен прависене хÿтĕлес енĕпе ĕçлекен комиссин черетлĕ ларăвĕ иртнĕ. Унта район прокурорĕн çумĕ Александр Кандасов та хутшăннă.
Ларура административлă йĕркене пăсни çинчен калакан 8 ĕçе пăхса тухнă. Граждансене тата çул çитменнисене 5100 тенкĕлĕх 3 штраф панă, 3 асăрхаттару çырнă, 1 ĕçе административлă майпа явап тыттарассин вăхăчĕ иртнине кура чарса лартнă, 1 ĕçе малалла тĕпчеме янă.
Çавăн пекех Канашри педагогика колледжĕн дирекцийĕн студента вĕренÿ учрежденийĕнчен кăларса ярасси çинчен калакан ходатайствине пăхса тухса ыйтнине тивĕçтернĕ. Ашшĕ-амăшне çул çитменскере пĕр уйăх тăршшĕнче ĕçе вырнаçтарма е урăх çĕре вĕренме яма сĕннĕ.
Федераллă следстви комитечĕн наркотĕрĕслев управленийĕн Канашри уйрăмĕн оперуполномоченнăйĕ Руслан Николаев наркăмăшлă япаласен çĕнĕ тĕсĕсем çинчен каласа панă. Вĕсем халăх хушшинче сарăласран асăрханмаллине çирĕплетнĕ.
Источник: "Каçал Ен"