15 июня 2013 г.
Республикăра июнĕн 3—9-мĕшĕсенче Атăл леш енчи «Буревестник» кану базинче Çамрăксен регионсем хушшинчи «МолГород — 2013» V вĕренÿ форумĕ иртнĕ. Унта пурĕ 1,5 пин çамрăк пухăннă, çавăн пекех Азербайджанран, Молдовăран, Беларуçрен хăнасем килнĕ.
Мероприятире Чăваш Ен Пуçлăхĕ Михаил Игнатьев та пулнă. «Влаç тĕллевĕ — сире пурнăçра хăвăрăн вырăна тупма, професси, пултарулăх енĕпе ÿсме пулăшасси», — тенĕ Михаил Васильевич яш-кĕрĕмпе хĕр-упраçа саламланă май. Çавăн пекех вăл çамрăксене патшалăх енчен пулăшнин ăнăçлă тĕслĕхĕсене асăннă.
«Эпир сире шанатпăр. Шăпах эсир пулас профессионалсем, республикăн ăнăçлă аталанăвĕ малашне сиртен килĕ», — палăртнă Михаил Игнатьев.
Форум программипе килĕшÿллĕн çамрăксен наука-техника пултарулăхĕн «НТТМ-2013» фестивалĕ уçăлнă. Унти проектсемпе, çавăн пекех Раççей ял çамрăкĕсен союзĕн вырăнти уйрăмĕн выставкипе паллашнă хыççăн Михаил Васильевич çамрăксене хăйсен таланчĕпе тата пултарулăхĕпе май пур таран туллин усă курма чĕнсе каланă.
Çавăн пекех республика Пуçлăхĕ «Патшалăхăн муниципалитет управленийĕ» лапам ĕçне хутшăннă, унта килнисен ыйтăвĕсене хуравланă.
Форума пирĕн район администрацийĕн представителĕсем Гузель Гадельянова, Татьяна Яковлева, Ольга Карсакова, Зульфия Низамова тата Ирина Николаева та хутшăннă.
«МолГород — 2013» форум — çулленхи лагерь. Çамрăксем пиллĕкмĕш çул ĕнтĕ кунта пухăнса палаткăсенче пурăнаççĕ, аталану программисемпе проекчĕсен никĕсне хываççĕ.
Ăна ЧР Министрсен Кабинечĕ, Россотрудничество, РФ Патшалăх Думин депутачĕ Алена Аршинова тата Шупашкар хулин администрацийĕ пулăшнипе республикăри çамрăксен «Çамрăксен социаллă технологийĕсем» общество организацийĕ йĕркеленĕ.
(ХАМĂР ИНФ.).
Источник: "Каçал Ен"