24 апреля 2013 г.
«Раççей Ял хуçалăх банкĕ» ОАОра ĕçне чунтан парăннă çынсем тăрăшаççĕ. Вĕсенчен пĕри вăл — Галина Хоральская. Вăл, Красноярск тăрăхĕнче çуралса ÿснĕскер, Шупашкарта 1976 çулта пĕлÿ илнĕ, ун хыççăн Патшалăх банкĕнче ĕçлеме пикеннĕ.
Тăрăшуллă çамрăк специалистпа юнашар опытлă, хисеплĕ, анлă тавра курăмлă çынсем пулни те пысăк пулăшу панă. Çавăн чухнех хĕр çирĕп палăртнă: вăл хăйĕн пурнăçне банк ĕçĕпе çыхăнтарать. «Банк тытăмĕнче 1977 çултанпах тимлетĕп. Урăх çĕрте ĕçлесе те курман. Туслă коллективра — пĕр çемьери пекех: савăнăçне те, хуйхи-суйхине те пĕрле пайлатпăр»,— тет вăл.
Ĕçĕ вара питĕ яваплă вĕсен: клиентсемпе шăкăл-шăкăл калаçмалла, яланах çивĕч ăс-тăнлă пулмалла. «Тĕрлĕ ыйтупа килнĕ çынна нихăçан та каялла кăларса ямастпăр»,— тет вăл ăш пиллĕхĕпе, çынна пулăшма хатĕр тăнипе палăрса.
«Паха опытлă наставник вăл»,— теççĕ ĕçтешĕсем Галина Григорьевна пирки. Ĕçре вăл çамрăксемшĕн яланах ырă тĕслĕх вырăнĕнче.
Сăмах май, Г.Хоральскаян хĕрĕсем те аслă пĕлÿллĕ, амăшĕ пекех сăпайлăскерсем, хисепе тивĕçнĕ.
М.ИЛЛАРИОНОВА.