21 ноября 2012 г.
Хаçат хăйĕн вулаканĕсем патне çитесси, вĕсене вăхăтра çĕнĕ хыпарсемпе паллаштарасси почтальонран нумай килет. Почтальон хаçатпа вулакансене çыхăнтаракан хăйне евĕр звено пулса тăрать. Комсомольскинчи почта уйрăмĕнче вăй хуракан Марина Чернова (сăн ÿкерчĕкре) çакна лайăх ăнланать, çавăнпа та ĕнтĕ хăйĕн ĕçне тÿрĕ кăмăлпа пурнăçлама тăрăшать. Кунсерен унăн хаçат-журнал тултарнă сумккине çакса нумай çухрăма утма тивет. Ара, кашни киле-çурта çитмелле-çке-ха, хыпарсемпе паллаштарса ĕлкĕрмелле.
Нумаях пулмасть районта çырăнтару вунă кунлăхĕ иртрĕ. Çак тапхăрта пичет материалĕсене йÿнĕрех хакпа çырăнма май пулчĕ. Марина Геннадьевна вунă кунлăх хушшинче халăха чи нумай хаçат-журнал çырăнтарма пултарчĕ. Çакăншăн вăл парнене тивĕçрĕ.
«Мĕн чухлĕ хаçат çырăнтарасси почтальонран хăйĕнчен килет. Марина Геннадьевна пирки вара ырăпа çеç асăнмалла. Кашнинпех пĕр чĕлхе тупма пĕлет вăл. Пуринпе те ăшшăн, кăмăллăн калаçнăшăн ĕнтĕ хисеплеççĕ ăна ял çыннисем», — тет ун çинчен почта уйрăмĕн начальникĕ Маргарита Индюкова.
Источник: "Каçал Ен"