21 ноября 2012 г.
Ял хуçалăхĕнче тата тирпейлекен промышленноçра ĕçлекенсен кунне халалланă уявра районти ветеринари станцийĕн тĕп бухгалтерне Валентина Васильевна Шатиловăна нумай çул тÿрĕ кăмăлпа ĕçленĕшĕн ЧР Патшалăх ветеринари службин руководителĕн Тав хучĕпе чысланă.
«Хăйĕн ĕçĕнче чăн-чăн ăста вăл»,— теççĕ Валентина Васильевна Шатилова пирки ĕçтешĕсем. Маттур та пултаруллă хĕрарăм районти ветеринари станцийĕнче тĕп бухгалтерта 4 çул вăй хурать. Пысăк опытлă ĕçчен малтан «Турхан» кооперативра тăрăшнă. 2004 çултанпа вара ветеринари станцийĕнче ĕçлет. Вăл — аслă пĕлÿллĕ специалист. «Шут ĕçне мĕн ачаранах кăмăллатăп. Çавна пулах çак профессие суйласа илтĕм те. Коллектив туслă пулни те хавхаланса ĕçлеме пулăшать», — тет тĕп бухгалтер. Çак хушăра вăл хăйĕн тивĕçĕсене туллин пурнăçласа пынă, паянхи кун та вăл ĕçре тăрăшуллă. Çитĕнÿсене кура Валентина Васильевнăна пĕрре мар тĕрлĕ Хисеп хучĕсемпе наградăланă та.
«Валентина Васильевна — вăр-вар та тăрăшуллă, ĕçченлĕхĕпе, сăпайлăхĕпе уйрăлса тăракан хĕрарăм. Чăн-чăн профессионал тимлет ветеринари станцийĕнче», — терĕ Р.Велимухаметов.
Источник: "Каçал Ен"