10 ноября 2012 г.
Кăçал ноябрĕн 1-мĕшĕ тĕлне район территорийĕнче 18 пушар регистрациленĕ (пĕлтĕрхи çак тапхăрта — 21). Пурĕ вĕсем 1327300 тенкĕлĕх тăкак кÿнĕ (пĕлтĕр — 655901). 9 çурт вутра çунса кĕлленнĕ, 14 — сиенленнĕ. Александровка, Кайнлăк ял поселенийĕсенче, пĕлтĕрхипе танлаштарсан, пушарсен шучĕ уйрăмах ÿснĕ.
Çак 10 уйăхра пулнă пушарсен тĕп сăлтавĕсем:
— электрооборудованипе усă курмалли правилăсене пăсни — 10 тĕслĕх (55,5 процент);
— кăмакасемпе тĕрĕс мар усă курни — 3 (16,6 процент);
— çулăмпа ĕçленĕ чух асăрханманни — 2 (11,2 процент);
— техника юсавсăр пулни — 2 (11,2 процент);
— ачасем вутпа выляни — 1 (5,5 процент).
Октябрь уйăхĕнче район территорийĕнче 3 хутчен «хĕрлĕ автан» алхаснă. Сăлтавĕ — электропроводсен юсавсăрлăхĕ. Акă, октябрĕн 4-мĕшĕнче çĕрле Йÿç Шăхалĕнче çулăм алхасма пуçланă. Унта мунча, сарай тата ытти хуралтăсем çунса кĕлленнĕ, пурăнакан кирпĕч çурт сиенленнĕ. Октябрĕн 7-мĕшĕнче вара Тăманлă Выçлинчи пĕр хуçалăхра пушар тухнă. Унта хуралтăсен тăрри çунса кайнă, çулăм кÿршĕсен хуçалăхне те сиен кÿнĕ.
«Хĕрлĕ автан» алхаснă тĕслĕхсем чылай пулнине кура, пурне те тепĕр хут аса илтеретпĕр: пушар хăрушсăрлăхĕн правилисене пăхăнни питĕ пĕлтерĕшлĕ. Çапла тусан çеç вутран сыхланма, пурлăха упраса хăварма пулать.
Источник: "Каçал Ен"