07 ноября 2012 г.
Почтальонка ĕçĕ чăннипех те йывăррине пытарма кирлĕ мар. Кунсерен вăл вуншар километр утать. Хаçат-журналпа тивĕçтернисĕр пуçне пенси парать, тĕрлĕ тавар сутать. «Пур ĕçре те вăр-вар та маттур вăл»,— теççĕ ун пирки ял-йышра. Галина Леонтьевна Ракчеева 12 çул Аслă Çĕрпÿел почта уйрăмĕнче тăрăшать. Кунсерен вăл Йăвашкел, Тутар Йăвашкел, Кĕçĕн Çĕрпÿел ялĕсенче хаçат-журнал салатать. «Шанса панă ĕçе вăл тÿрĕ кăмăлпа пурнăçлать. Плана яланах тултарса пырать. Хаçат-журнал чылай çырăнтарать. Пирĕн, çамрăксен, унран вĕренмелли нумай»,— тет почта уйрăмĕн начальникĕ Надежда Вячеславовна Ильина.
Источник: "Каçал Ен"