31 октября 2012 г.
Район территорийĕнче октябрь уйăхĕн 12—14, 26—28-мĕшĕсенче «Ÿсĕр водитель» операци икĕ тапхăрпа иртрĕ. Çав вăхăтра ГИБДД сотрудникĕсем рейдсем йĕркелерĕç.
Юлашки çулсенче водительсен дисциплинине хытарас тесе саккунсемпе правилăсене çирĕплетсе пыраççĕ пулин те, руль умне ÿсĕрле ларакансен шучĕ çав-çавах чакмасть. Операцисен тапхăрĕнче 13 водителе, «симĕс çĕленпе» туслашнăскерсене, явап тыттартăмăр. Хĕрĕнкĕ шоферсенчен 12-шĕ медицина тĕрĕслевĕ витĕр тухма килĕшмерĕ. Вĕсем çине РФ Административлă кодексĕн 12.26 статйин 1, 2-мĕш пайĕсемпе протокол çырнă. Айăплă çынсенчен 3-шĕн руль умне ларма та юраман, мĕншĕн тесен ÿсĕрле çÿренĕшĕн маларах явап тытнăскерсем пулнă-çке. Миравай судья иртнĕ кунсенче вĕсем тĕлĕшпе пуçарнă административлă ĕçе пăхса тухнă, 10-шар талăк административлă майпа арестлеме йышăну кăларнă.
Ĕçкĕ-çикĕ никама та ырă тумасть. Çавăнпа та автомашинăпа урăлла çеç çÿремеллине çирĕп асăрхаттаратпăр.
Источник: "Каçал Ен"