01 сентября 2012 г.
Чăваш Енре вĕренÿре, тĕпчев, ăслăлăх, пултарулăх, производство ĕçĕ-хĕлĕнче курăмлă çитĕнÿсем тунă пин çамрăка çуллен ЧР Пуçлăхĕн стипендийĕпе хавхалантараççĕ. Ăна 14-ран пуçласа 30 çул тултарнисем, республикăра пурăнакансем кăна тивĕçме пултараççĕ.
Претендентсен докуменчĕсене паянтан, сентябрĕн 1-мĕшĕнчен, район администрацийĕн вĕренÿ пайĕнче йышăнма тытăнаççĕ. Çитĕнÿ туни çинчен çирĕплетекен материалсене юлашки 3 çултине тăратма юрать.
Енчен те кандидат уголовлă, административлă е дисциплинарлă майпа явап тытнă пулсан, унăн докуменчĕсене йышăнмаççĕ.
Суя е тĕрĕс мар сведенисемлĕ документсем тăратнă организацисенчен стипендиата парса тăнă укçана организацисенчен хăйсенчен республика бюджетне шыраса илме саккун пур. Кандидат хăйĕн çинчен суя е тĕрĕс мар информаци парсан та Чăваш Республикин Пуçлăхĕн хушăвĕпе килĕшÿллĕн стипенди парассине чарса лартма пулать. Ун пек чухне вара стипендиатăн хăйĕн республика бюджетне укçа хывма тивĕ.
Сăмах май, пĕр çын 2 çулта пĕр хутчен кăна ЧР Пуçлăхĕн стипендине тивĕçме пултарать.
Источник: "Каçал Ен"