06 июня 2012 г.
Комсомольски райповĕн производство комбиначĕ тутлă çи-мĕçсем пĕçерме тытăннăранпа кăçал çулталăк çитет. Коллектива Елена Розова заведующи ертсе пырать. Вун çичĕ çынран тăракан йыш кунсерен кукăль-булка, аш-какай изделийĕсем (полуфабрикатсем) 35 пин тенкĕлĕх пĕçерсе-хатĕрлесе магазинсене, шкулсене ăсатать. Уйрăм çынсенчен те заказсем йышăнать.
Надежда Чипчигина райпо тытăмĕнче 38 çул ĕçлет. Маларах чылай çул кондитер цехĕнче вăй хунă. «Эпир, ялта çуралса ÿснĕскерсем, пĕчĕкренех чустаран тĕрлĕ çимĕçсем пĕçерме хăнăхатпăр. Çак ĕçрех ĕмĕр иртрĕ ĕнтĕ», — шÿтлет Надежда Николаевна.
Надежда Гималиевăпа Гельфия Фасхутдинова райпо тытăмĕнче нумай çул ĕçлеççĕ. Надежда Ильинична маларах «Весна» ресторанта поварта тăрăшнă. Гельфия Зиатдиновна темиçе теçетке çул повар-кондитерта ĕçлет. «Тавар çаврăнăшне малашне те ÿстерсе пырасчĕ. Чи пахи вăл пирĕншĕн — туянакансем эпир хатĕрленĕ çимĕçсене юратса çини», — теççĕ тăрăшуллă кондитерсем.
Источник: "Каçал Ен"