14 апреля 2012 г.
Пĕрлешÿллĕ ял хуçалăх предприятийĕсем хĕрсех çур акине хатĕрленеççĕ. Уй-хир культурисен тухăçĕ çине минераллă удобренисемпе усă курни те пысăк витĕм кÿрет. Çакна шута илсе хуçалăхсем тăрăшсах удобренисем янтăлаççĕ. Район администрацийĕн ял хуçалăх пайĕн тĕп агрономĕ Илдус Миннетуллин пĕлтернĕ тăрăх, хуçалăхсенче апрелĕн 6-мĕшĕ тĕлне пурĕ 1,5 пин тонна тĕрлĕ удобрени пур. Çак енĕпе чи ăнăçлă ĕçлекеннисем — «Слава картофелю» агрофирма (341 т), «Рассвет» (170 т), «Дружба» (126 т) ял хуçалăх производство кооперативĕсем, «Сюрбеево» ТМЯО (100 т). Удобренисене Кирово-Чепецк хулинчен тата ЧР Ял хуçалăх министерствин «Продфонд» КУПĕ урлă туянаççĕ. Условисем те аван — çур хакне малтан тÿлемелле, ыттине — кĕркунне.
Çунтармалли-сĕрмелли материалсем пирки те маларах шутлама хăнăхнă ял ĕçченĕ. Кăçал района çăмăллатнă хакпа (1 тонни – 20500 тенкĕ) 506 тонна çуллахи дизтопливо уйăраççĕ. Ял хуçалăх предприятийĕсем Сергач хулинчен апрельте 121 тонна, май уйăхĕнче 191, июньте 146 тонна топливо турттарса килме пултараççĕ. Март уйăхĕнче вара 49 тонна уйăрнă. Апрелĕн 1-мĕшĕ тĕлне хуçалăхсенче 338 тонна дизель топливи пулнă. Çур аки ĕçĕсене ирттерме вара 400 тонна кирлĕ.
Источник: "Каçал Ен"