21 марта 2012 г.
Сывă кĕлеткере — çирĕп ăс-тăн, теççĕ. Сывлăхлă пулас тесен мĕн ачаранах кĕлеткене пиçĕхтермелли, ÿт-пĕве аталантармалли, спортпа туслашмалли каламасăрах паллă. Çакна тĕпе хурса йĕлтĕрпе чупма кăмăллакансем иртнĕ вырсарни кун Комсомольскинчи вăрман хĕррине «Каçал ен» хаçат призĕсемшĕн йĕркеленĕ ăмăртăва пуçтарăнчĕç. Хĕвеллĕ, ăшă çанталăк савăк кăмăл парнелерĕ, часрах йĕлтĕр йĕрĕ çине тăма хистерĕ.
Чи малтанах хальхи вăхăтра район администрацийĕн пуçлăхĕн тивĕçĕсене пурнăçлакан М.Р.Афанасьев, «Слава картофелю» агрофирма генеральнăй директорĕ Х.С.Идиатуллин, «Кĕтне» ФСК директорĕ Е.А.Тихонов, РОО начальникĕ Н.А.Максимов тата «Каçал ен» хаçатăн тĕп редакторĕ Л.Г.Шуряшкина спорт уявĕ ячĕпе саламларĕç, ăнăçлă старт сунчĕç.
Часах вăрман уçланки савăнăçлă шăв-шавпа, куракансем йĕлтĕрçĕсене хавхалантарса кăшкăрнипе тулчĕ. Малтанах старта районти пĕтĕмĕшле пĕлÿ паракан тĕп шкулсенче вĕренекенсем тухрĕç. Çăмăллăнах çухрăм хыççăн çухрăм хыçа хăварса чĕчкенсем финиша пĕрремĕш çитрĕç. Тăманлăвыçлисем те вĕсенчен чылай кая юлмарĕç, иккĕмĕш вырăн йышăнчĕç. Хирти Явăш тĕп шкулĕн вĕренекенĕсем вара виççĕмĕшсем пулчĕç.
Вăтам шкулсен командисем хушшинче те тупăшу питĕ хĕрÿ иртрĕ. Нумай çухрăмлă дистанцие чи малтан парăнтарса нĕркеçсем пĕрремĕш вырăна тухрĕç. Аслă Чурачăк вăтам шкулĕн вĕренекенĕсем финиша иккĕмĕш çитрĕç. Виççĕмĕш вырăнта кĕçĕнçĕрпÿелсем пулчĕç.
Çавăн пекех VIP-чупу та иртрĕ. Унта районти ял хуçалăх предприятийĕсен ертÿçисем хутшăнчĕç. «Рассвет» ЯХПК председателĕ В.Никифоров пĕрре-мĕш вырăна тивĕçрĕ. М.Шарафутдиновпа («Труд») М.Афанасьев иккĕмĕшпе виççĕмĕш вырăнсене пайларĕç.
Организацисемпе учрежденисен командисем те айккинче юлмарĕç, йĕлтĕр сырса старта тухрĕç. Пĕрремĕшпе иккĕмĕш вырăнсене дистанцие пĕр пек кăтартупа парăнтарса Комсомольски 1-мĕш вăтам тата Хырхĕрри тĕп шкулĕсен учительсен командисем пайларĕç. Виççĕмĕш вырăна Чĕчкен тĕп шкулĕн вĕрентекенĕсем тивĕçрĕç.
Кашни ушкăнри çĕнтерÿçĕсене Хисеп грамотисемпе тата кубоксемпе чысларĕç, парнесем пачĕç. Пĕрремĕш вырăна тухнă командăсене редакци «Каçал ен» хаçата 2012 çулăн иккĕмĕш çур çулĕ валли тÿлевсĕр çырăнтарса парать. Çавăн пекех ăмăртăва хутшăннă пур команда та парнеллĕ пулчĕ. Эстафетăна йĕркелесе ирттерме спонсорла пулăшу паракансене уйрăммăн палăртса хăварас килет. «Кĕтне» ентешлĕхĕн, «Слава картофелю» агрофирмăн, «Заря», «Рассвет», «Труд», «Победа», «Алга», «Слава», «Восток», «Асаново», «Луч» ЯХПКсен, Ивановăн, Атласкинăн, «Кызыл сабанча» фермер хуçалăхĕсен, «Сельхозхими» тата «Таныш» пасарăн ертÿçисем пулăшнипе мероприяти тивĕçлĕ шайра иртрĕ.
Юлашкинчен çакна каласа хăвармалла. Ăмăртура пурте çĕнтерÿçĕ пулаймаççĕ, выляса яма та пĕлмелле. Çапах та çак эстафетăра выляса яракансем пулмарĕç тесен те юрать, мĕншĕн тесен вăрманти уçă сывлăшпа сывласа, çут çанталăк илемĕпе киленсе кăмăла хăпартлантарни, вăхăт тупса çирĕплетни вăл хăех çĕнтерÿ.