14 марта 2012 г.
Районти чи лайăх ĕлкĕрсе пыракан дояркăсене Пĕтĕм тĕнчери Хĕрарăмсен кунĕ умĕн пуçтарса саламласси йăлана кĕнĕ ĕнтĕ. Кăçал та чи маттуррисене палăртса «Весна» ресторана йыхравларĕç.
Уява Комсомольскинчи культурăпа кану центрĕн ĕçченĕ Валентина Курицына ертсе пычĕ, ăшă сăмахсемпе пуçтарăннисен чун-чĕрисене тыткăнларĕ.
Чи малтанах ял хуçалăх ĕçченĕсене район администрацийĕн пуçлăхĕ Геннадий Волков саламларĕ. «Паянхи кун районта çулталăкра 5000 килограмм ытла сĕт сăвакансем йышлă пулни савăнтарать. Унчченхипе танлаштарсан ку — пысăк ÿсĕм. Тепĕр çул вĕсен шучĕ тата та ÿсессе шанатăп»,— терĕ вăл пуçтарăннисене малалла та çакăн пек ĕçчен те тарават пулма сунса.
Унтан район администрацийĕн ял хуçалăх пайĕн начальникĕ Михаил Афанасьев сĕт суса илессин пĕлтĕрхи кăтартăвĕсемпе кĕскен паллаштарчĕ, ку енĕпе чи лайăх ĕçлекен хуçалăхсене палăртрĕ. Ял хуçалăх пайĕн тĕп зоотехникĕ Киям Гимальдинов пуçтарăннисене саламласа ăшă сăмахсем каларĕ, малашне те ĕçре ăнăçу сунчĕ.
Малалла чи кĕтнĕ самант çитрĕ, пултаруллă ĕçченсене Хисеп грамотисемпе тата хаклă парнесемпе чысларĕç. Чи нумай сĕт сăвакан ятне «Восток» ЯХПК доярки Л.Никифорова тивĕçрĕ. Пĕлтĕр вăл кашни ĕнерен вăтамран 6681 килограмм сĕт суса илнĕ. В.Шикован (çак хуçалăхранах) кăтартăвĕ — 5993 килограмм, Л.Чижикован («Асаново» ЯХПК) — 5958 килограмм. «Восток» ЯХПКри М.Казиковăна (5926 килограмм), «Асаново» ЯХПКри Л.Ивановăна (5877 килограмм), «Пайгас» ЯХПКри З.Киргизовăна (5837 килограмм), «Рассвет» ЯХПКри А.Черновăна (5658 килограмм) та палăртса хăварас килет. Çавăн пекех районти чи тăрăшуллă ферма заведующийĕсем, зоотехниксем, осеменаторсем тата ветеринари врачĕ Хисеп хучĕсене тивĕçрĕç.
Уяв малалла тăсăлнă май пултаруллă ĕçченсем нумай салам сăмахĕ илтрĕç, юрласа-ташласа савăнчĕç.
Источник: "Каçал Ен"